Ўзбекистон Президенти АҚШнинг етакчи компаниялари, инвестиция фондлари ва молиявий институтлари раҳбарлари билан кенг қамровли давра суҳбати ўтказди.

Мазкур учрашувда Америка Қўшма Штатлари Президентининг Жанубий ва Марказий Осиё бўйича махсус вакили Сержио Гор, глобал шерикликлар бўйича махсус вакил Паоло Замполли, АҚШ Савдо вазири ўринбосари Уильям Киммитт ҳамда Америка–Ўзбекистон савдо палатаси раиси Керолин Лемм иштирок этди.

Шунингдек, Franklin Templeton, Citigroup, BNY Mellon, NASDAQ, Boeing, Mastercard, Visa, General Motors, Nvidia, Oppenheimer, Jefferies, Air Products, Traxys, FLSmidth, GoGreen Partners, Cleveland Clinic, Cargill каби дунё миқёсида тан олинган йирик компаниялар раҳбарлари ва топ-менежерлари, шунингдек, Ўзбекистоннинг етакчи корхоналарининг вакиллари тадбирда қатнашди.

Президент Шавкат Мирзиёев ўз нутқида АҚШ Президенти Доналд Трамп билан яқинда бўлиб ўтган мулоқот тафсилотларига алоҳида тўхталди. Учрашувда икки давлат ўртасидаги иқтисодий ҳамкорликни янги босқичга олиб чиқиш, узоқ муддатли истиқболга мўлжалланган салмоқли ва амалий лойиҳалар портфелини шакллантириш бўйича муҳим келишувларга эришилгани қайд этилди.

Шу муносабат билан, давра суҳбатида ушбу келишувларни амалда рўёбга чиқариш, янги ташаббусларни илгари суриш ва ўзаро ҳамкорлик имкониятларини кенгайтиришда алоҳида аҳамият касб этиши таъкидланди.

Сўнгги йилларда Ўзбекистон ва АҚШ ўртасидаги савдо-иқтисодий алоқалар сезиларли даражада кенгайди. Хусусан, товар айирбошлаш ҳажми 8 йил ичида қарийб 4 баробар ошди, бу эса икки давлат ўртасидаги иқтисодий ҳамкорликнинг барқарор ривожланаётганидан далолат беради. Ҳозирги кунда АҚШнинг 300 дан ортиқ компанияси мамлакат бозорига кириб келиб, турли соҳаларда сармоя киритмоқда ва фаолият юритмоқда. Бундан ташқари, Franklin Templeton билан ҳамкорликда Миллий инвестиция жамғармаси ташкил этилгани Ўзбекистоннинг халқаро молия майдонида ўз мавқеини мустаҳкамлашига хизмат қилмоқда.

Учрашув якунларида Президент Шавкат Мирзиёев ва АҚШ Президентининг махсус вакили Сержио Гор ҳузурида икки томонлама битимларни алмашиш маросими бўлиб ўтди.

Бу маросим доирасида савдо-иқтисодий ва инвестициявий ҳамкорликни янада чуқурлаштиришга қаратилган қатор ҳужжатлар имзоланди.

Жумладан:

Ўзбекистон Транспорт вазирлиги ва Boeing компанияси ўртасида транспорт соҳасида узоқ муддатли ҳамкорликни йўлга қўйиш тўғрисида битим (22 та Boeing учоқлари);
Технопарк корхонаси ва FLSmidth компанияси ўртасида тоғ-кон ускуналарини ишлаб чиқариш бўйича қўшма корхона ташкил этиш тўғрисида битим;
Akfa Group ва Cleveland Clinic ўртасида кўп тармоқли клиника ҳамда таълим муассасасини барпо этиш бўйича битим;
Centrum Air авиакомпанияси ва Oppenheimer инвестиция компанияси ўртасида ўзаро шерикликни ривожлантириш бўйича битим;
Иқтисодиёт ва молия вазирлиги ҳамда Citigroup компанияси ўртасида ҳамкорлик тўғрисида битим;
Ўзбекгидроэнерго ва Cargill Financial Services International компанияси ўртасида молиявий ҳамкорлик тўғрисида битим;
Ўзтрансгаз ва Pangea Filtration Technology компанияси ўртасида ҳамкорликни йўлга қўйиш бўйича битим;
Тоғ-кон саноати ва геология вазирлиги ҳамда Cove Capital компанияси ўртасида истиқболли майдонларда геология-қидирув ишларини олиб бориш тўғрисида битим;
Янги Кон корхонаси ва SLB компанияси ўртасида ҳамкорликни йўлга қўйиш бўйича битим;
Ўзбекистон Тикланиш ва тараққиёт жамғармаси билан Biologic International компанияси ўртасида сунъий интеллект ва биотехнологиялар соҳасидаги лойиҳаларни молиялаштириш учун жамғармалар ташкил этиш бўйича битим.

Шунингдек, Ўзбекистонда АҚШнинг Blackrock инвестиция компанияси билан қўшма фонд ташкил этилиши ҳам келишиб олинди. Бундан ташқари, энергетика ва транспорт соҳаларида шерикликни кенгайтириш режалаштирилгани алоҳида қайд этилди.

АҚШда федерал ҳукумат маблағ етишмаслиги сабаб фаолиятини тўхтатди

Boeingʼдан Blackrockʼгача: Ўзбекистон ва АҚШ ўртасида қандай битимлар имзоланди?