Трампнинг уруш тезда тугаши ҳақидаги баёнотларидан кейин нефт нархи 93 долларгача пасайди

АҚШ президенти Доналд Трамп Эрондаги уруш “жуда тез орада” якунланишига ишора қилганидан сўнг, жаҳон бозорида нефть нархи сезиларли даражада пасайди.

Душанба куни Яқин Шарқдан энергия таъминотининг узоқ муддатли узилишига олиб келиши мумкинлиги ҳақидаги хавотирлар сабаб нефтнинг бир баррели нархи қарийб 120 долларгача кўтарилган эди. Бироқ Трампнинг баёнотидан сўнг нарх 93 доллар атрофида пасайди.

Гарчи хом нефть нархи урушдан олдинги даврга нисбатан ҳали ҳам сезиларли даражада юқори бўлса-да, фонд бозорлари тезда тиклана бошлади.

• Лондоннинг FTSE 100 индекси савдони 1,3 фоиз ўсиш билан бошлади.
• Осиё бозорларидаги савдолар давомида Brent хом нефти нархи бир пайтнинг ўзида 84 доллардан пастга тушиб, кейин яна 93,76 долларгача кўтарилди.
• АҚШнинг West Texas Intermediate (WTI) хом нефти эса 4 фоизга арзонлашиб, бир баррели 90,96 долларни ташкил қилди.

Президентнинг айтишича, у “уруш деярли тўлиқ якунланди” деб ҳисоблайди. Флоридадаги матбуот анжуманида у буни шундай изоҳлади:

“Биз кичик бир экскурсия уюштирдик, чунки қандайдир ёвузликдан қутулиш учун буни қилишимиз керак деб ҳис қилдик. Кейин эса бу жуда қисқа экскурсия бўлганини кўрасиз”.

Бироқ Трамп Эронни глобал нефть ва газ таъминоти учун жуда муҳим бўлган Ҳурмуз бўғозини тўсиб қўймаслик ҳақида қатъий огоҳлантирди.

“Агар Эрон Ҳўрмуз бўғозида нефть оқимини тўхтатадиган бирор иш қилса, Америка Қўшма Штатлари уларга шу пайтгача берилган зарбалардан йигирма баробар қаттиқроқ зарба беради”, — деб ёзди у ижтимоий тармоқларда.

Бунга жавобан, Ислом инқилоби қўриқчилари корпуси Эрон қуролли кучлари минтақадан “бир литр ҳам нефть экспорт қилинишига йўл қўймаслигини” маълум қилди.

Ҳўрмуз бўғози жаҳон энергия бозори учун ниҳоятда муҳим ҳисобланади — дунё нефтининг қарийб бешдан бир қисми айнан шу тор денгиз йўли орқали ўтади.

Форс кўрфазида юк ташиш хавфсизлиги кескин ошаётган хавф билан боғлиқ.

Халқаро тадқиқотлар бўйича С. Ражаратнам мактаби тадқиқотчиси Парк Ки Хюн қуйидагиларга эътибор қаратди:

• Ҳозирги нефть нархлари АҚШ ва Исроилнинг Эронга ҳаво ҳужумларидан олдинги даражадан қарийб 20 фоизга юқори бўлиб қолмоқда.
• Нархлар ҳали ҳам беқарор бўлиб қолади, чунки юк ташувчи компаниялар хавф-хатарни ҳисобга олиб қўшимча устама тўловлар талаб қилмоқда.