Oʻzbekistonda elektron xizmatlar koʻrsatuvchi xorijiy kompaniyalar 2025 yilning yanvar–sentabr oylarida 124,8 milliard soʻm miqdorida soliq toʻladi. Bu haqda Davlat soliq qoʻmitasi maʼlum qildi.

Maʼlumotlarga koʻra, ushbu koʻrsatkich 2024 yilning shu davriga nisbatan 44 foizga oʻsgan.

Hisobot davrida Oʻzbekistonda elektron shaklda xizmat koʻrsatuvchi xorijiy kompaniyalar soni 73 taga yetdi. Bu raqam yil boshidan beri 10 taga, oʻtgan yil boshiga nisbatan esa 18 taga koʻpdir.

2025 yil yanvar–sentabr oylarida xorijiy kompaniyalar tomonidan koʻrsatilgan elektron xizmatlar qiymati 1,048,6 trln soʻmni tashkil etgan. Toʻlangan soliqlar hajmi esa 124,8 mlrd soʻm boʻlib, bu ham oʻtgan yilga nisbatan 44 foiz oʻsishni koʻrsatadi.

Eng koʻp soliq toʻlagan kompaniyalar orasida Meta, Apple va Google yetakchilik qilmoqda.
Meta kompaniyasi 293,4 mlrd soʻmlik xizmat koʻrsatib, 35,2 mlrd soʻm soliq toʻlagan. Apple’ning koʻrsatkichlari deyarli shunga yaqin — xizmatlar hajmi 292,6 mlrd soʻm, soliq toʻlovi 35,1 mlrd soʻm. Google esa 265,8 mlrd soʻmlik xizmat uchun 31,1 mlrd soʻm soliq toʻlagan.

Toʻrtinchi oʻrinni esa ChatGPT’ning ishlab chiquvchisi OpenAI egalladi. Kompaniya 39,8 milliard soʻmlik xizmat koʻrsatib, 4,7 milliard soʻm soliq toʻlagan. OpenAI yaqinda 5 dollarlik GO obuna turini Oʻzbekistonda ham taqdim qildi. Bundan keyingi oylarda ham kompaniya xizmatlari oʻsishini kutish mumkin.

Top oʻntalikka shuningdek OpenAI (39,8 mlrd / 4,7 mlrd soʻm), Booking.com (24,3 mlrd / 2,9 mlrd soʻm), TikTok (22,3 mlrd / 2,6 mlrd soʻm), Netflix (10,7 mlrd / 1,3 mlrd soʻm), ACCA (9,6 mlrd / 1,1 mlrd soʻm), Zoom (9,3 mlrd / 1,1 mlrd soʻm) va Amazon (10,7 mlrd / 1,0 mlrd soʻm) kompaniyalari ham kirgan.

Shu bilan birga, 2025 yilning dastlabki toʻqqiz oyi davomida 6 ta kompaniya roʻyxatdan chiqarilgan boʻlsa, 16 ta yangi xorijiy kompaniya Oʻzbekiston soliq tizimida hisobga olingan.

Shuningdek, 2025 yilning yanvar–sentabr oylarida 6 ta kompaniya roʻyxatdan chiqarilgan, biroq 16 ta yangi kompaniya hisobga olingan.

Meta, Apple, Google va OpenAI: 9 oy ichida xorijiy texno-gigantlar Oʻzbekistonda qancha soliq toʻladi?