Apple, Meta, Google va TikTok: 2025 yilda xorijiy texno-gigantlar Oʻzbekistonda qancha soliq toʻladi?

2025 yilda elektron xizmat koʻrsatuvchi xorijiy kompaniyalar Oʻzbekistonda qancha soliq toʻlagani maʼlum boʻldi. Bu haqda Soliq qoʻmitasi matbuot xizmati xabar berdi.

Oʻzbekistonda elektron xizmatlar koʻrsatuvchi 78 ta xorijiy kompaniyalar tomonidan 181,3 mlrd soʻm soliq toʻlangan.

Ushbu koʻrsatkich 2024 yilning mos davriga nisbatan 50% oʻsgan. Toʻlangan soliqlarning 93,05%i elektron xizmatlar koʻrsatuvchi quyidagi 10 ta xorijiy kompaniyalar hissasiga toʻgʻri keladi.

Eng katta savdo aylanmasi va soliq tushumi Apple hissasiga toʻgʻri kelib, kompaniya Oʻzbekistonda 413,1 mlrd soʻmlik xizmat koʻrsatgan va 49,5 mlrd soʻm soliq toʻlagan.

Meta kompaniyasining xizmatlar qiymati 410,9 mlrd soʻm, toʻlangan soliqlar esa 49 mlrd soʻmni tashkil etgan. Kuchli uchlikda Google ham bor — 375 mlrd soʻmlik xizmatlar va 44,4 mlrd soʻm soliq.

Shuningdek, OpenAI Oʻzbekistonda 57,8 mlrd soʻmlik xizmatlar koʻrsatib, 11,7 mlrd soʻm soliq toʻlagan. Booking.com xizmatlar hajmi 36,1 mlrd soʻm, soliqlar esa 4,3 mlrd soʻmni tashkil qilgan.

Qizigʻi Oʻzbekistonda bloklangan boʻlishiga qaramay, TikTok ham 29,4 mlrd soʻmlik xizmatlar koʻrsatib, 3,5 mlrd soʻm soliq toʻlagan.

Mashhur striming platforma Netflix Oʻzbekistonda 14,9 mlrd soʻmlik xizmatlar koʻrsatib, 1,8 mlrd soʻm soliq toʻlagan. 

Oʻz navbatida, ACCA — 13,2 mlrd soʻm va 1,6 mlrd soʻm, Xsolla — 12,9 mlrd soʻm va 1,5 mlrd soʻm, Amazon esa 14 mlrd soʻmlik xizmatlar uchun 1,4 mlrd soʻm soliq toʻlagan.

Maʼlumot oʻrnida, 2025 yil davomida 8 ta kompaniya soliq toʻlovchilar roʻyxatidan chiqarilgan, 23 ta yangi xorijiy kompaniya esa roʻyxatga qoʻshilgan.