Galaxy S25 сериясидаги асосий янгиланишлар

Ишлаш самарадорлиги

Серия Galaxy учун мўлжалланган Snapdragon 8 Elite чипсети билан жиҳозланган бўлиб, у Qualcomm’нинг энг кучли процессоридир. Чипсет унумдорлик, самарадорлик ва уланиш имкониятларини сезиларли даражада яхшилайди. Дастлабки синовлар шуни кўрсатмоқдаки, Galaxy S25 Ultra кўп функцияли вазифаларда ўзидан олдинги моделдан ва ҳатто iPhone 16 Pro Max каби рақибларидан ҳам ўзиб кетмоқда. Сериянинг барча моделларида 12 Гб оператив хотира мавжуд бўлиб, бу бир вақтнинг ўзида бир нечта дастурлар билан қотишларсиз ишлашни таъминлайди.

Сунъий интеллект (AI) интеграцияси

S25 серияси Android 15 ва One UI 7 асосида ишлаб, Galaxy AI номи остида такомиллаштирилган сунъий интеллект имкониятларини тақдим этади. Бу имкониятларга кенгайтирилган нусха кўчириш-жойлаш функциялари ва вазифаларни кетма-кет бажариш учун AI Select каби хусусиятлар киради. Samsung етти йил давомида операцион тизим ва хавфсизлик янгиланишларини таъминлашни ваъда қилмоқда, бу эса узоқ муддатли қўллаб-қувватлаш нуқтаи назаридан таҳсинга сазовордир.

Дизайн ўзгаришлари

Samsung S25 сериясида аввалги дизайнни сақлаб қолиб, фақат Ultra моделларига бироз ўзгартириш киритди. Смартфонлар бироз юпқароқ бўлиб, қалинлиги 7,2 миллиметрни ташкил қилади. Бундан ташқари, смартфон қирралари ҳам бироз юмалоқлашган. Кўпчилик буни iPhone’дан илҳомланган дизайн деб атамоқда.

Камера янгиланишлари

S25 Ultra’да янги 50 МП ултра-кенг объектив қўшилган бўлиб, кенг бурчак ва макро суратга олиш сифатини яхшилайди. S25 ва S25+ моделлари эса ўтган йилдаги 50 МП кенг объектив, 10 МП 3х телефото линза ва 12 МП ултракенг объективни сақлаб қолган.

S25 ва S25+ моделлари S24 қаторлари билан бир хил экран ўлчами ва камера конфигурациясига эга. S25 Ultra бироз янгиланган дизайнга эга бўлса-да, оддий фойдаланувчи ташқи дизайнда унчалик катта фарқларни сезмайди.

Ultra ингичка – S25 Edge

Samsung, шунингдек, Калифорниядаги тадбир якунида флагман моделларининг юпқароқ версияси Galaxy S25 Edge’ни намойиш этди. Смартфон фақатгина иккита камерага эга бўлиб, улардан биттаси 200 МПлик камера билан жиҳозланган.

Смартфоннинг аниқ сотувга чиқиш санаси маълум эмас, лекин тахминларга қараганда, қурилма шу йилнинг май ойларида харидорларга тақдим этилади. Аввалроқ, Samsung бундай смартфон устида ишлаётгани ҳақида хабар берган эдик.

Samsung’нинг янги S25 серияси қанчалик яхши?