2025 йилнинг энг яхши смартфонлари: Pinkod.uz’дан ТОП-10 рейтинг
Pinkod нуфузли халқаро технологик нашрлар ва тест синовлари натижаларига таянган ҳолда, нарх, сифат ва инновация мутаносиблигига кўра йилнинг энг сара моделлари рўйхатини тузди.
2025 йил смартфонлар олами учун ҳақиқий бурилиш даври бўлди, десак муболаға бўлмайди. Йил бошида Samsung ўзининг Galaxy S25 серияси билан флагманлар сегментида рақобатни бошлаб берган бўлса, сентябрь ойида Apple iPhone 17 линияси орқали бу беллашувни янада кескинлаштирди. Шу билан бирга, Google, Xiaomi ва бошқа йирик ишлаб чиқарувчилар ҳам технологик жиҳатдан кучли ва инновацион моделларни тақдим этиб, бозордаги рақобатни янги босқичга олиб чиқди.
Pinkod.uz MKBHD (Marques Brownlee) Smartphone Awards 2025, TechRadar, The Verge, CNET, Tom’s Guide, Android Authority каби нуфузли нашрларнинг йил якунлари бўйича рейтинглари, тестлари ва таҳлилларига таянган ҳолда 2025 йилнинг энг яхши смартфонлари рўйхатини тақдим этади.
ТОП–10 Смартфонлар Рейтинги
1. Samsung Galaxy S25 Ultra
Ушбу модель кўплаб етакчи технологик нашрлар — жумладан Tom’s Guide, TechRadar ва Android Authority томонидан 2025 йилнинг энг кучли Android флагмани сифатида эътироф этилди.
Қурилмага ўрнатилган Snapdragon 8 Elite процессори юқори унумдорлик ва барқарор ишлашни таъминласа, 6,9 дюймли Dynamic AMOLED 2X дисплей бозордаги энг сифатли экранлардан бири сифатида эътироф этилмоқда. 200 МП асосий камера ҳамда 5х ва 10х перископ зум имкониятлари профессионал даражадаги суратга олишни таъминлайди.
Шунингдек, S Pen қўллаб-қувватлаши ва Galaxy AI функциялари ушбу смартфонни нафақат қудратли техник қурилма, балки кундалик фойдаланиш учун ҳам ниҳоятда қулай воситага айлантиради.
2. iPhone 17 Pro Max
Кўплаб нуфузли технологик нашрлар ушбу моделни ҳозирги кунда энг кучли iPhone сифатида эътироф этмоқда ва умумий рейтингларда унга иккинчи ўрин берилган. A19 Pro чипи юқори тезлик ва барқарор ишлашни таъминлаб, кундалик фойдаланишдан тортиб профессионал вазифаларгача мукаммал унумдорликни намойиш этади.
48 MP уч камерали тизим ProRes Log ва 4K 120 fps видео ёзиш имконияти билан профессионал даражадаги контент яратишга йўл очади. 55 соатдан ортиқ батарея ишлаш вақти, iOS 26ъдаги Liquid Glass интерфейси ҳамда Apple Intelligence функциялари қурилмани янада қулай ва ақлли қилади.
Айнан шу жиҳатлари сабабли ZDNET ва CNET нашрлари ушбу моделни “йилнинг энг мувозанатли Pro смартфони” дея баҳолаган.
3. Google Pixel 10 Pro / Pro XL
DXOMARK ва The Verge нашрлари ушбу моделни “энг яхши камера ва сунъий интеллект тажрибасига эга смартфон” дея эътироф этди.
Tensor G5 процессори илғор AI имкониятларини тўлиқ намоён этиб, суратга олишдан тортиб кундалик фойдаланишгача бўлган барча жараёнларда юқори аниқлик ва тезкорликни таъминлайди.
Шунингдек, 7 йиллик дастурий янгиланиш ва хавфсизлик кафолати қурилмани узоқ муддат давомида ишончли ҳамроҳга айлантиради. Айнан шу жиҳатлари сабаб у кўплаб экспертлар томонидан “энг ақлли Android-смартфон” сифатида эътироф этилмоқда.
4. Apple iPhone 17 (Базавий модель)
Йилнинг энг катта сюрпризларидан бири айнан шу модель бўлди. У MKBHD Smartphone Awards 2025 маросимида “Phone of the Year” унвонига сазовор бўлди. Энг муҳим янгилик шундаки, 120 Hz ProMotion дисплей, телефото камера ва илгари фақат Pro моделларга хос бўлган бир қатор имкониятлар энди оддий версияда ҳам тақдим этилди.
Шу орқали Apple илк бор ҳақиқатан ҳам “ҳамма учун етарли бўлган iPhone” концепциясини тўлиқ рўёбга чиқарди ва кенг аудитория учун мувозанатли, кучли ҳамда замонавий қурилма яратди.
5. OnePlus 13 (ёки 15 серияси)
Android Authority томонидан "Муҳаррир танлови" мукофотига сазовор бўлган ушбу смартфон ўзининг юқори унумдорлиги билан ажралиб туради.
Snapdragon 8 Elite процессори, 6000 mAh’дан ортиқ улкан батарея ва 100W тезкор зарядлаш технологияси уни ҳам ўйин, ҳам оғир вазифалар учун ишончли “монстр’’га айлантиради.
6. Vivo X300 Pro
Vivo X300 Pro ҳозирги пайтда мобил фотография ихлосмандлари учун энг кучли камера-флагманлардан бири сифатида тилга олинмоқда.
Смартфон 6510 mAh сиғимли бақувват батарея ва рекорд даражадаги 4500 нит ёрқинликка эга LTPO AMOLED дисплей билан жиҳозланган.
7. Xiaomi Ultra 15
GSMArena ва NotebookCheck томонидан "Best Cameraphone 2025" (Йилнинг энг яхши камерафони) деб эътироф этилган.
Қурилма Snapdragon 8 Elite чипи ва 6100+ mAh батарея билан таъминланган бўлиб, узоқ вақт давомида юқори сифатли контент яратиш имконини беради.
8. Honor Magic7 Pro
Юқори даражадаги технологияларни ўзида жамлаган ҳақиқий флагманлардан бири сифатида эътироф этилади. Қурилма Snapdragon 8 Elite Gen 5 процессори билан жиҳозланган бўлиб, максимал унумдорлик ва барқарор ишлашни таъминлайди. 5600 mAh сиғимли батарея реал фойдаланишда бемалол икки кунгача етиши билан ажралиб туради.
Смартфон 200 MP асосий камера ва перископ телефото модуль билан жиҳозланган бўлиб, айниқса тунги суратга олиш ва узоқ масофали зумда юқори натижаларни намойиш этади. 6,8 дюймли LTPO AMOLED дисплей (4500 нит ёрқинлик) эса нафақат силлиқ тасвир, балки энг ёруғ шароитда ҳам мукаммал кўринишни таъминлайди.
9. Nothing Phone(3)
Технология ва эстетика уйғунлиги. The Verge ва Android Authority томонидан "Энг ўзига хос дизайн" дея баҳоланган.
Nothing’нинг 2025-йилги флагмани Snapdragon 8s Gen 4 чипи, 5000 mAh батарея ва ортиқча иловалардан холи тоза Nothing OS тизими билан келади. У индивидуализмни қадрлайдиганлар учун идеал танлов.
10. Samsung Galaxy S25 (базавий модель)
Ихчамлик ва мувозанатни қадрлайдиган фойдаланувчилар учун идеал танлов. Galaxy S25 флагман даражасидаги имкониятларни ихчам ва қулай корпусда таклиф қилади.
Ултра версиядан фарқли ўлароқ, ушбу модель енгил, эргономик ва бир қўл билан бошқариш учун жуда мос. Кундалик фойдаланишда қулайликни биринчи ўринга қўядиганлар учун айни муддао.
120 Hz янгиланиш тезлигига эга 6,3 дюймли AMOLED дисплей, кучли Snapdragon 8 Elite процессори ҳамда 50 MP учталик камера тизими юқори сифатли ишлашни ҳеч қандай муросасиз таъминлайди.
