Birinchi yarim yillik yakunida Oʻzbekiston banklari kredit portfeli 642,81 trln soʻmga yetdi. Oʻsish 38,81 trln soʻm yoki 6,4 foizni tashkil etdi.

Shu davrda muammoli kreditlar 4,89 trln soʻm yoki 27,1 foizga koʻpayib, 22,94 trln soʻmga chiqdi. Yaʼni NPL hajmi umumiy kredit portfeliga qaraganda toʻrt baravardan tezroq oʻsgan. Natijada uning jami kreditlardagi ulushi 3 foizdan 3,6 foizgacha koʻtarildi.

Davlat ulushi mavjud banklarning muammoli kreditlari yarim yillikda 3,61 trln soʻmga oshib, 16,45 trln soʻmga yetdi. Bu bank tizimidagi jami NPLning 71,7 foiziga teng.

Ayni paytda davlat banklari mamlakat kredit portfelining 65,7 foizini egallaydi. Yaʼni ularning muammoli kreditlardagi ulushi kredit bozoridagi ulushidan 6 foiz punktga yuqori.

Xususiy va xorijiy banklarning NPL hajmi esa 1,28 trln soʻmga oshib, 6,50 trln soʻmni tashkil etdi. Ushbu guruhda muammoli kreditlarning jami kreditlardagi ulushi 2,9 foizga teng.

Eng katta oʻsish Mikrokreditbankda

Yarim yillikda muammoli kreditlar eng koʻp Mikrokreditbankda oshgan. Bankning NPL hajmi 894 mlrd soʻmdan 1,80 trln soʻmga yetdi. Oʻsish 902 mlrd soʻm yoki 100,9 foizni tashkil etdi.

Keyingi oʻrinlarni Xalq banki va Agrobank egalladi. Xalq bankidagi muammoli kreditlar 501 mlrd soʻmga, Agrobankda esa 493 mlrd soʻmga koʻpaygan.

Bank	Kredit portfeli	NPL hajmi	Yil boshidan oʻzgarish
Mikrokreditbank	22,84 trln soʻm	1,80 trln soʻm	+902 mlrd soʻm
Xalq banki	37,40 trln soʻm	1,53 trln soʻm	+501 mlrd soʻm
Agrobank	91,21 trln soʻm	3,19 trln soʻm	+493 mlrd soʻm
Anorbank	12,14 trln soʻm	901 mlrd soʻm	+422 mlrd soʻm
TBC Bank	8,32 trln soʻm	1,01 trln soʻm	+418 mlrd soʻm
Biznesni rivojlantirish banki	25,78 trln soʻm	1,49 trln soʻm	+376 mlrd soʻm
Asakabank	40,43 trln soʻm	1,87 trln soʻm	+372 mlrd soʻm
Oʻzsanoatqurilishbank	60,99 trln soʻm	1,99 trln soʻm	+345 mlrd soʻm
Aloqabank	21,65 trln soʻm	782 mlrd soʻm	+305 mlrd soʻm
Ipak yoʻli bank	18,75 trln soʻm	405 mlrd soʻm	+225 mlrd soʻm

Birinchi beshta bankdagi oʻsishning oʻzi 2,74 trln soʻmni tashkil etdi. Bu bank tizimidagi sof oʻsishning qariyb 56 foiziga teng.

Ayrim banklarda oʻsish surʼati yuqoriroq boʻlgan. Jumladan, Orient Finance bankdagi NPL 21 mlrd soʻmdan 224 mlrd soʻmga, Universal bankda esa 11 mlrd soʻmdan 49 mlrd soʻmga oshgan.

Qaysi banklarda NPL kamaydi?

Yil boshidan muammoli kreditlar hajmini eng koʻp Kapitalbank kamaytirgan. Bankdagi NPL 1,02 trln soʻmdan 822 mlrd soʻmga tushdi. Kamayish 198 mlrd soʻm yoki 19,4 foizni tashkil etdi.

Ipoteka-bankdagi muammoli kreditlar esa 164 mlrd soʻmga qisqarib, 1,09 trln soʻmni tashkil qilgan.

Bank	1 yanvar	1 iyul	Kamayish
Kapitalbank	1 020 mlrd soʻm	822 mlrd soʻm	−198 mlrd soʻm
Ipoteka-bank	1 257 mlrd soʻm	1 093 mlrd soʻm	−164 mlrd soʻm
Poytaxt bank	69 mlrd soʻm	37 mlrd soʻm	−32 mlrd soʻm
Ziraat Bank Uzbekistan	84 mlrd soʻm	72 mlrd soʻm	−12 mlrd soʻm
Hayot bank	186 mlrd soʻm	183 mlrd soʻm	−3 mlrd soʻm

Eng katta muammoli kreditlar qaysi banklarda?

Mutlaq miqdorda eng katta muammoli kredit portfeli Oʻzmilliybankda saqlanib qolmoqda — 3,21 trln soʻm. Agrobank 3,19 trln soʻm bilan undan atigi 17 mlrd soʻm ortda turibdi.

Bank	NPL hajmi
Oʻzmilliybank	3,21 trln soʻm
Agrobank	3,19 trln soʻm
Oʻzsanoatqurilishbank	1,99 trln soʻm
Asakabank	1,87 trln soʻm
Mikrokreditbank	1,80 trln soʻm
Xalq banki	1,53 trln soʻm
Biznesni rivojlantirish banki	1,49 trln soʻm
Ipoteka-bank	1,09 trln soʻm
TBC Bank	1,01 trln soʻm
Anorbank	901 mlrd soʻm

Ushbu oʻnta bank hissasiga tizimdagi jami muammoli kreditlarning qariyb 84 foizi toʻgʻri keladi.

NPL ulushi eng yuqori bank — TBC Bank

Muammoli kreditlarni bankning umumiy kredit portfeliga nisbatan hisoblaganda eng yuqori koʻrsatkich TBC Bank’da qayd etilgan. Bankda NPL ulushi 12,1 foizni tashkil etgan. Yil boshida bu koʻrsatkich 5,7 foiz edi.

Keyingi oʻrinlarda 7,9 foiz bilan “Mikrokreditbank”, 7,4 foiz bilan “Anorbank”, 7,3 foiz bilan “Poytaxt bank”, 6,8 foiz bilan AVO bank va 6,7 foiz bilan Garant bank joylashgan.

KDB Bank Oʻzbekiston, Octobank va Uzum bankda muammoli kreditlar qayd etilmagan.

2026 yilning birinchi yarmida Oʻzbekiston banklaridagi NPL hajmi 27,1 foizga oshdi

Fevralda banklardagi muammoli kreditlar 897 mlrd soʻmga koʻpaydi

2026 yil boshida Oʻzbekiston banklarida muammoli kreditlar hajmi oshdi

Oʻzbekiston banklaridagi muammoli kreditlar hajmi yana oʻsmoqda