Июль ойида мамлакат банкларидаги муаммоли кредитлар (НПЛ) 684 млрд сўмга кўпайиб, 22,5 трлн сўмга етди. Бу банкларнинг умумий кредит портфелида 3,9 фоиз улушни ташкил қилди.

Шу даврда умумий кредит портфели 1 трлн сўмга ортиб, 576,2 трлн сўмга етди. Бироқ бу кўрсаткич охирги ойлардаги энг паст ўсишлардан бири бўлди. Кредит портфелининг сустлашишига асосан Ўзмиллийбанк (-3,9 трлн сўм) ва Ўзсаноатқурилишбанк (-889 млрд сўм) кредит ҳажмларининг камайиши сабаб бўлди.

Шу билан бирга, давлат банклари ичида энг катта ўсиш Агробанк (1,0 трлн сўм), Алоқабанк (713 млрд сўм) ва Халқ банкида (446 млрд сўм) кузатилди.

Муаммоли кредитларнинг кескин кўпайишига ҳам асосан давлат банклари сабаб бўлди. Жумладан, Ўзмиллийбанк (+594,2 млрд сўм), Микрокредитбанк (+121,1 млрд сўм) ва Асака банк (+106,1 млрд сўм) энг катта ҳиссага эга бўлди.

Хусусий банклар орасида эса TBC Bank (+70,2 млрд сўм), Анорбанк (+44,6 млрд сўм) ва Тенге Банкда (+39,9 млрд сўм) муаммоли кредитлар сезиларли даражада ошган.

Аввалроқ Pinkod банклардаги кредитлар бўйича ўртача фоиз ставка кетма-кет учинчи ой ҳам ошаётгани ҳақида ёзган эди. Марказий банк маълумотига кўра, апрель ойида 22,6 фоиз бўлган ставка июль ойига келиб 23,8 фоизга етган.

Ўзбекистон банкларидаги муаммоли кредитлар ҳажми яна ўсмоқда