“InFinBank” акциядорлик жамияти устав капиталини 900 миллиард сўмдан 1 триллион 440 миллиард сўмгача ошириш бўйича қарор қабул қилди. Устав капиталининг 540 миллиард сўмга кўпайтирилиши янги чиқарилаётган оддий ва имтиёзли акцияларни жойлаштириш ҳисобига амалга оширилади.

Мазкур чиқарилиш доирасида номинал қиймати 1 000 сўм бўлган 240 000 000 дона оддий, ҳужжатсиз шаклдаги акциялар ва 300 000 000 дона имтиёзли, ҳужжатсиз шаклдаги акциялар муомалага чиқарилади. Умумий ҳисобда чиқарилаётган акциялар қиймати 540 миллиард сўмни ташкил этади.

Қўшимча акциялар “Акциядорлик жамиятлари ва акциядорларнинг ҳуқуқларини ҳимоя қилиш тўғрисида”ги Қонуннинг 35-36-моддаларига мувофиқ, аввало банкнинг амалдаги акциядорларига имтиёзли сотиб олиш ҳуқуқи асосида, кейинчалик эса чекланмаган инвесторлар ўртасида очиқ обуна шаклида жойлаштирилади.

Акциялар учун тўловлар фақат пул кўринишида, яъни нақд ва/ёки нақдсиз шаклда, фақат Ўзбекистон Республикасининг миллий валютасида амалга оширилади.

Агар имтиёзли ҳуқуқдан кейин акциялар тўлиқ сотилмаса, қолган қисми очиқ обуна орқали Тошкент Республика фонд биржасида чекланмаган инвесторлар орасида жойлаштирилади. Бунда акциялар савдоси фонд биржанинг савдо қоидалари асосида амалга оширилади. Акциялар банк Кузатув кенгаши томонидан белгиланган бозор нархида, аммо номинал қийматдан паст бўлмаган нархда сотилади.

Тошкент фонд биржаси хабарига кўра, оддий акциялар 15 майдан бошлаб мазкур фонд биржанинг котировка рўйхатига киритилади ва савдога қўйилади.

“InFinBank” АЖ устав капиталини 540 миллиард сўмга оширмоқда