Infinbank’нинг асосий акциядори Фарҳод Маматжонов Perfectum’нинг 50 фоиз улушини сотиб олишга рухсат олди
Рақобат қўмитаси битим мобил алоқа бозоридаги рақобат муҳитига салбий таъсир кўрсатмайди, деган хулосага келди. Ҳозир Perfectum операторининг 50 фоиз улуши Абдумалик Иминовга, 37,5 фоизи “IMC-Capital”га ва 12,5 фоизи Камрон Акбаровга тегишли. Фарҳод Маматжонов Infinbank’нинг 45,7 фоиз акциясига эга бўлиб, “Safo Airlines” ва бошқа қатор компанияларда ҳам иштирокчи ҳисобланади.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси Фарҳод Маматжоновнинг “Rubicon Wireless Communication” МЧЖ устав капиталидаги 50 фоиз улушни сотиб олиш бўйича аризасини кўриб чиқди.
“Rubicon Wireless Communication” Ўзбекистонда Perfectum савдо белгиси остида мобил алоқа хизматларини кўрсатади.
Қўмита Махсус комиссияси ўтказган таҳлил натижасида битим товар бозоридаги рақобат муҳитига салбий таъсир кўрсатмаслиги ҳақида хулосага келинди. Шундан сўнг ариза қаноатлантирилиб, иқтисодий концентрация битимига розилик берилди.
Perfectum ҳозир кимга тегишли?
Корхона ва ташкилотларнинг ягона давлат реестридаги маълумотларга кўра, ҳозирда “Rubicon Wireless Communication” МЧЖнинг 50 фоиз улуши Абдумалик Иминовга тегишли. Компаниянинг яна 37,5 фоиз улушига “IMC-Capital” МЧЖ, 12,5 фоизига эса Камрон Акбаров эгалик қилади. Операторнинг устав капитали 304,62 млрд сўмни ташкил этади.
Рақобат қўмитаси Маматжонов 50 фоизлик улушни айнан кимдан сотиб олаётганини очиқламади. Бироқ компаниядаги ягона 50 фоизлик пакет ҳозирда Абдумалик Иминовга тегишли.
Perfectum 2024 йил бошида тўлиқ хусусийлаштирилгани маълум бўлган. Ўша вақтда операторнинг 100 фоиз улуши Абдумалик Иминовга тегишли эди. Кейинчалик таъсисчилар таркибига “IMC-Capital” ва Камрон Акбаров кириб, Иминовнинг улуши 50 фоизгача қисқарган.
Infinbank’нинг энг йирик акциядори
Фарҳод Маматжонов Infinbank’нинг энг йирик акциядори ҳисобланади. Банк акциядорлари таркибига оид маълумотларга кўра, унинг Infinbank’даги улуши қарийб 45,7 фоизни ташкил этади. Банкнинг яна 25,6 фоиз улуши “Prestij Rielt”га, 19,2 фоизи “Tadbirkorlikni rivojlantirish kompaniyasi”га, 6,6 фоизи “Azia Trans Terminal”га, қарийб 2,9 фоизи эса Парвиз Абдусамадовга тегишли.
iHamkor.uz маълумотларига кўра, Маматжонов “UZTEX TASHKENT”, “Azia Trans Terminal”, “Rakat Plaza”, “Sofa Marva Tour”, “Terassa” ва “Safo Airlines” каби компанияларда ҳам таъсисчи ёки иштирокчи сифатида қайд этилган.
Аввалроқ Маматжонов авиация соҳасидаги “Safo Airlines” МЧЖни ташкил этгани ҳақида хабар берилганди.
7 май куни давлат рўйхатидан ўтказилган компаниянинг 60 фоиз улуши Маматжоновга, 30 фоизи Михаил Аленкинга, қолган 10 фоизи эса Авазжон Тошпўлатовга тегишли. Компаниянинг асосий фаолият йўналиши ҳаво транспорти соҳасидаги ёрдамчи хизматлар кўрсатиш этиб белгиланган.
