Йил бошидан бери банклардаги муаммоли кредитлар 6 трлн сўмга кўпайди
1 сентябрь ҳолатига банклардаги муаммоли кредитлар 24 трлн сўмга етиб, жами кредит портфелининг 3,7 фоизини ташкил этди.
Шу даврда умумий кредит портфели 7,4 фоизга ўсган бўлса, NPL ҳажми 6 трлн сўмга кўпайди.
Энг катта ўсиш Микрокредитбанкда 1,24 трлн сўм, Анорбанкда 632,2 млрд сўм, Халқ банкида 528,4 млрд сўм ва Агробанкда 511 млрд сўмни ташкил этди.
2026 йил 1 сентябрь ҳолатига Ўзбекистон банкларидаги муаммоли кредитлар 24 трлн сўмга етиб, жами кредит портфелининг 3,70 фоизини ташкил этди. Йил бошидан бери NPL ҳажми 6 трлн сўмга ёки 33,1 фоизга кўпайган.
Шу даврда банкларнинг умумий кредит портфели 604 трлн сўмдан 648,9 трлн сўмга етди. Ўсиш 44,9 трлн сўм ёки 7,4 фоизни ташкил қилди. Муаммоли кредитлар ҳажми кредит портфелига қараганда қарийб 4,4 баравар тезроқ ўсган.
Бир йил аввал банкларнинг кредит портфели 581,1 трлн сўм, муаммоли кредитлари эса 21,8 трлн сўм эди. Шундан келиб чиқиб, кредитлар йиллик ҳисобда 67,9 трлн сўмга ёки 11,7 фоизга, NPL ҳажми эса 2,2 трлн сўмга ёки 10,2 фоизга ошган.
Бироқ NPLнинг кредит портфелидаги улуши бир йил олдинги 3,75 фоиздан 3,70 фоизга тушган. Яъни йил бошидан бери кредитлар сифати ёмонлашган бўлса-да, NPL улуши ўтган йилнинг шу даврига нисбатан 0,05 фоиз пункт пастлигича қолмоқда.
Ўсишнинг 62 фоизи давлат банклари ҳиссасига тўғри келди
Давлат улуши мавжуд банклардаги муаммоли кредитлар йил бошидан бери 3,7 трлн сўмга ошиб, 16,5 трлн сўмга етган. Бу банк тизимидаги жами NPL ўсишининг 62,2 фоизини ташкил қилади.
Давлат улуши мавжуд банкларнинг кредит портфели эса 17 трлн сўмга ёки 4,2 фоизга ошган. NPLнинг портфелдаги улуши 3,17 фоиздан 3,93 фоизга кўтарилган.
Давлат улуши мавжуд бўлмаган банкларда кредит портфели 28 трлн сўмга ёки 14 фоизга ўсиб, 227,5 трлн сўмга етган. Муаммоли кредитлар эса 2,3 трлн сўмга ёки 43,2 фоизга кўпайиб, 7,5 трлн сўмни ташкил этган. NPL улуши 2,62 фоиздан 3,29 фоизга ошган.
Энг катта ўсиш Микрокредитбанкда
Муаммоли кредитларнинг мутлақ ҳажми бўйича энг катта ўсиш Микрокредитбанкда қайд этилган. Банкнинг NPL ҳажми 894 млрд сўмдан 2,14 трлн сўмга етган — ўсиш 1,24 трлн сўм ёки 139 фоиз. NPL улуши эса 4,41 фоиздан 9,20 фоизга кўтарилган.
Кейинги ўринларда:
| NPL ўсиши | Йил бошидаги улуш | Ҳозирги улуш | |
|---|---|---|---|
| Анорбанк | 632,2 млрд сўм | 4,75% | 8,76% |
| Халқ банки | 528,4 млрд сўм | 3,07% | 4,15% |
| Агробанк | 511 млрд сўм | 3,33% | 3,39% |
| ТБС Банк | 440,5 млрд сўм | 5,71% | 13,37% |
| Бизнесни ривожлантириш банки | 421,7 млрд сўм | 4,52% | 5,85% |
| Алоқабанк | 378,1 млрд сўм | 2,54% | 3,77% |
| Ҳамкорбанк | 238,3 млрд сўм | 0,80% | 1,40% |
| Ориент Финанс Банк | 235,8 млрд сўм | 0,15% | 1,87% |
| Асакабанк | 203,6 млрд сўм | 3,62% | 4,37% |
Ўзмиллийбанк, Ипак Йўли Банк, SQB, Капиталбанк, Туронбанк, Ҳаёт Банк, Тенге Банк, Трастбанк, Asia Alliance Bank, Гарант банк, Мадад Инвест Банк, Универсалбанк, Инфинбанк, Ziraat Bank Uzbekistan, AVO банк, Пойтахт Банк, Open Bank, Apex Bank ва Uzum Bankда ҳам NPL ҳажми ошган.
Умуман, йил боши билан таққослаш мумкин бўлган 34 та банкнинг 29 тасида муаммоли кредитлар кўпайган.
Учта банкда NPL камайди
Муаммоли кредитлар ҳажми фақат учта банкда қисқарган:
- Ипотека-банкда — 145,2 млрд сўмга, 1,26 трлн сўмдан 1,11 трлн сўмга;
- Давр Банкда — 2,3 млрд сўмга;
- Содерот Банкда — 326 млн сўмга.
KDB Банк Ўзбекистон ва Октобанкда йил бошида ҳам, 1 сентябрь ҳолатига ҳам муаммоли кредитлар қайд этилмаган.
NPL улушининг энг катта пасайиши Пойтахт Банкда кузатилган — 24,4 фоиздан 13,2 фоизга ёки 11,22 фоиз пунктга. Бироқ банкдаги муаммоли кредитларнинг мутлақ ҳажми 24,3 млрд сўмга ошган. Улушнинг камайишига кредит портфелининг NPLдан тезроқ кенгайиши сабаб бўлган.
NPL улуши энг тез Мадад Инвест Банкда ошди
Муаммоли кредитлар улушидаги энг катта ўсиш Мадад Инвест Банкда қайд этилган. Кўрсаткич 0,62 фоиздан 10,04 фоизга, яъни 9,42 фоиз пунктга ошган.
Кейинги ўринларда TBC Bank — 7,66 фоиз пункт, Микрокредитбанк — 4,79 фоиз пункт ва Анорбанк — 4,01 фоиз пункт билан қайд этилган.
Ҳозирги NPL ҳажми бўйича Агробанк 3,21 трлн сўм билан биринчи ўринда турибди. Ундан кейин Ўзмиллийбанк — 3,17 трлн сўм ва Микрокредитбанк — 2,14 трлн сўм келади.
Кредит портфелидаги NPL улуши бўйича эса TBC Bank 13,37 фоиз билан энг юқори кўрсаткичга эга. Пойтахт Банкда бу кўрсаткич 13,18 фоиз, Мадад Инвест Банкда 10,04 фоиз, Микрокредитбанкда 9,20 фоиз ва Анорбанкда 8,76 фоизни ташкил этган.
