Американинг Forbes журнали дунёнинг энг бой одамлари рейтингини эълон қилди. Бу йил Форбесънинг йиллик Жаҳон миллиардерлари рўйхатига дунё бўйлаб 3028 киши киритилди. Уларнинг умумий бойлиги 2025 йил учун рекорд даражадаги 16,1 триллион долларни ташкил этмоқда.

Илон Маск $342 миллиардлик бойлиги билан дунёнинг энг бой одами сифатида қайт этилди. У Бернар Арнони ортда қолдириб, Форбесънинг 2025-йилги рейтингида биринчи ўринни эгаллади.

Meta асосчиси Марк Цукерберг илк бор иккинчи ўринга кўтарилиб, Amazon раҳбари Жефф Безос ва Oracle асосчиси Ларри Эллисонни ортда қолдирди. 2024 йилда энг бой одам бўлган Бернар Арно эса бу йил бешинчи ўринга тушди.

Топ 10 рўйхат:

#	Исм	Бойлик	Даромад манбаи	Давлат
1	Илон Маск	$342 млрд	Tesla, SpaceX, xAI	АҚШ
2	Марк Цукерберг	$216 млрд	Meta	АҚШ
3	Жефф Безос	$215 млрд	Amazon	АҚШ
4	Ларри Эллисон	$192 млрд	Oracle	АҚШ
5	Бернар Арно	$178 млрд	LVMH	Франция
6	Уоррен Баффет	$154 млрд	Berkshire Hathaway	АҚШ
7	Ларри Пейж	$144 млрд	Google	АҚШ
8	Сергей Брин	$138 млрд	Google	АҚШ
9	Аманио Ортега	$124 млрд	Zara	Испания
10	Стив Балмер	$118 млрд	Microsoft	АҚШ

Дунёдаги 3028 миллиардернинг 406 нафари аёллар бўлиб, улар жами миллиардерларнинг 13,4 фоизини ташкил этади. Бу йил уларнинг сони 2024 йилдаги 369 нафардан (13,3 фоиз) кўпайди. Дунёнинг энг бой аёли мақомини Walmart меросхўри Элис Уолтон эгаллади, у француз L’Oréal меросхўри Франсуаза Беттенкур Меерсни ортда қолдириб, аёллар орасида биринчи ўринни қўлга киритди.

Диққатга сазовор жиҳати шундаки, миллиардер фуқаролар рўйхатида Америка Қўшма Штатлари 902 нафар билан етакчилик қилмоқда. Ундан кейин Хитой (Гонконг билан бирга) 516 нафар билан иккинчи ўринда туради. Ҳиндистон эса 205 нафар миллиардер билан учинчи ўринни эгаллаб турибди.

Ўзбекистонлик миллиардер

Алишер Усмонов илк бор ушбу рўйхатда Ўзбекистон вакили сифатида қайд этилди.

USM Holdings асосчиси бўлган Алишер Усмонов аввалги йилларда Россия вакили сифатида кўрсатилган эди. Бироқ, эндиликда Forbes уни расмий равишда Ўзбекистон тадбиркори сифатида эътироф этди. Унинг бойлиги ўтган йилга нисбатан $3,3 миллиардга ортиб, ҳозирда $16,7 миллиардни ташкил этмоқда. Шунингдек, Усмонов жаҳон рейтингида 144-ўриндан 125-ўринга кўтарилди.

Мавзуга доир: Трамп инаугурациясидан бери энг бой миллиардерлар жами $209 млрд йўқотди

2025 йилнинг энг бой одамлари — Forbes