Olmaliq kon-metallurgiya kombinati (OKMK) 2025 yil yanvar-sentabr oylariga oid moliyaviy hisobotini eʼlon qildi. Hisobotga koʻra, kompaniya sof foydasida sezilarli oʻsish qayd etilgan.

2025 yilning 9 oyida OKMKning mahsulot ishlab chiqarish daromadlari 34,8 trillion soʻmni tashkil qilib, oʻtgan yilning shu davriga nisbatan 27,7%ga oshgan. Mahsulot realizatsiyasi uchun ketgan xarajatlar 14,9 trillion soʻmni tashkil qilgan. Kompaniya toʻlagan soliqlar esa ikki barobar oshib, 6,3 trillion soʻmni tashkil etdi.

Barcha xarajatlar va soliqlar hisobga olgach, OKMKning sof foydasi 8,3 trillion soʻm yoki taxminan 694 million dollarni tashkil qilgan. Bu oʻtgan yilning mos davriga nisbatan 35,1%ga yoki 2,16 trillion soʻmga koʻproqdir.

Avvalroq Pinkod Oʻzbekistondagi ikki yirik kon 2024 yilda eng koʻp oltin ishlab chiqargan konlar roʻyxatiga kirgani haqida yozgan edi. Mining.com hisoblariga koʻra, Muruntov konida 2024 yil davomida qariyb 2,7 million unsiya oltin qazib olinib, ikkinchi oʻrinni egallagan, Olmaliq koni esa beshinchi oʻrinda qayd etilgan.

OKMK 9 oyda qariyb 700 mln dollar sof foyda oldi