Azimov Feruz Ikromovich “Poytaxt Bank” AJ boshqaruv raisi etib tayinlandi. Bu haqda bank Kuzatuv kengashi qarorida qayd etilgan.

U bilan uch yil muddatga mehnat shartnomasi tuzilgan. Feruz Azimov Markaziy bankning tegishli roziligi olingach, rasman lavozimiga kirishadi.

Feruz Azimov bunga qadar Oʻzbekiston Respublikasi Markaziy banki tizimida turli masʼul lavozimlarda faoliyat yuritgan.

U 1988 yilda Samarqand shahrida tugʻilgan. Maʼlumoti oliy. 2009 yilda Samarqand davlat universitetini, 2024 yilda esa Bank-moliya akademiyasining magistratura bosqichini iqtisodiyot mutaxassisligi boʻyicha tamomlagan.

Azimov bank tizimidagi faoliyatini 2009 yilda “Asakabank” AJ Samarqand viloyati filialida mutaxassis sifatida boshlagan. 2019 yilga qadar mazkur bankning Samarqand viloyati hamda Afrosiyob filiallarida turli lavozimlarda, jumladan, Valyuta va nosavdo amaliyotlari boʻlimi boshligʻi sifatida ishlagan.

2019 yil aprel oyidan boshlab Oʻzbekiston Respublikasi Markaziy bankida faoliyatini davom ettirgan. Markaziy bank tizimida bosh iqtisodchi, boshqarma boshligʻi oʻrinbosari va boshqarma boshligʻi kabi lavozimlarda ishlagan.

Feruz Azimov 2022 yil oktabr oyidan buyon Markaziy bankning Valyutani tartibga solish va toʻlov balansi departamenti direktori oʻrinbosari — valyuta oqimlari tahlili boshqarmasi boshligʻi lavozimida faoliyat yuritib kelayotgan edi.

Shuningdek, yigʻilish qarori bilan “Poytaxt Bank” AJ tashkiliy tuzilmasiga bank boshqaruvi raisining birinchi oʻrinbosari lavozimi ham kiritilgan. Boshqaruv raisining birinchi oʻrinbosari lavozimiga Davron Isroilov, boshqaruv raisi oʻrinbosari lavozimiga esa Shaig Gaziyev tayinlangan.

Feruz Azimov “Poytaxt Bank” boshqaruv raisi etib tayinlandi

“Poytaxt bank” kuzatuv kengashi barcha aʼzolarining vakolatlari muddatidan avval tugatildi