Osiyo Taraqqiyot Banki (OTB) tomonidan eʼlon qilingan yangi hisobotga koʻra, Oʻzbekiston iqtisodiyoti 2025 yilda 6,6 foizga oʻsishi kutilmoqda, 2026 yilda esa bu koʻrsatkich 6,7 foizga yetadi. Ushbu oʻsish sanoat va xizmatlar sohasining izchil kengayishi, shuningdek, ichki talabning barqarorligiga tayanadi.

2024 yilda mamlakat yalpi ichki mahsuloti (YaIM) 6,5 foizga oshdi. OTBning Oʻzbekistondagi vakolatxonasi direktori Kanokpan Lao-Arayaning aytishicha, bu hukumatning sanoat, qurilish va boshqa muhim tarmoqlarni rivojlantirishga qaratilgan aniq harakatlari samarasi boʻldi.U, shuningdek, infratuzilmani yaxshilash va mintaqaviy integratsiyani kuchaytirish orqali Oʻzbekiston barqaror va muvozanatli iqtisodiy oʻsishga erishishi mumkinligini taʼkidladi.

Hisobotga koʻra, inflyatsiya 2024 yilda 9,4 foizga pasaydi (2023 yildagi 10 foizdan), bu esa qatʼiy pul-kredit siyosati hamda import tovarlari uchun tashish xarajatlarining kamayishi hisobiga yuz berdi.

Shunga qaramay, xizmatlar sohasidagi inflyatsiya 21,8 foizga koʻtarilgan, bunga elektr energiyasi va tabiiy gaz narxlarining oshirilishi sabab boʻlgan. Kelgusi yillarda umumiy inflyatsiya darajasi pasayib, 2025 yilda 8,0 foizga, 2026 yilda esa 7,0 foizga tushishi prognoz qilinmoqda.

Sanoat sohasi har yili oʻrtacha 7,0 foizga oʻsishi kutilmoqda. Bu, bir tomondan, oziq-ovqat, neft-kimyo mahsulotlari va toʻqimachilikka boʻlgan tashqi talab, ikkinchi tomondan esa konchilik mahsulotlariga ichki ehtiyoj bilan bogʻliq.

Xizmatlar sohasi ham izchil rivojlanishda davom etadi — 2025 yilda 7,8 foiz, 2026 yilda esa 7,9 foizlik oʻsish kutilmoqda. Byudjet taqchilligi esa fiskal intizom va konchilik sohasidagi barqaror daromadlar evaziga 2025–2026 yillarda YaIMning 4 foizigacha qisqaradi.

OTB Oʻzbekistonda $3,6 mlrdlik 23 ta yangi loyiha amalga oshiradi

Oʻzbekiston iqtisodiy oʻsishi 2025 yilda 6,6 foizga yetadi – OTB prognozi