Bu haqda 10 sentabr kuni Iqtisodiyot va moliya vazirligi huzuridagi Byudjetdan tashqari pensiya jamgʻarmasi ijrochi direktori Murodbek Atajanov maʼlum qildi.

Pensiya islohoti loyihasiga koʻra, erkaklar uchun pensiya yoshi hozirgi 60 yildan 63 yilgacha, ayollar uchun esa 55 yildan 58 yilgacha oshiriladi. Bu jarayon bosqichma- bosqich amalga oshirilib, har yili 6 oydan qoʻshib borilishi mumkin

Atajanovning taʼkidlashicha, koʻplab mamlakatlarda pensiya yoshi allaqachon 65 yildan yuqori. Oʻzbekistonda esa bu masalada oxirgi 32 yil davomida oʻzgarish boʻlmagan. “Boshqa davlatlar pensiya yoshini oshirdi, faqat Oʻzbekiston qolgandi”, — dedi u.

Mutasaddining soʻzlariga koʻra, Oʻzbekistonda umr koʻrish davomiyligi ortib bormoqda. Sogʻliqni saqlash vazirligi maʼlumotlariga koʻra, bugungi kunda oʻrtacha umr 75 yilni tashkil etadi. Agar bundan 20 yil avval erkaklar pensiyadan keyin oʻrtacha 8–9 yil, ayollar esa 12–13 yil umr koʻrgan boʻlsa, hozirda erkaklarda bu koʻrsatkich 12,5 yil, ayollarda esa 20 yilni tashkil etmoqda.

Shu bilan birga, pensiya yoshini oshirish boʻyicha yakuniy qaror hali qabul qilinganicha yoʻq. Pensiya jamgʻarmasi bu borada aholining fikrini yigʻish uchun maxsus platforma ishga tushirmoqchi. Platforma bir oy davomida faol boʻladi. Keyin tushgan takliflar oʻrganilib, yana muhokama oʻtkaziladi, kerakli oʻzgarishlar kiritilib, loyiha jurnalistlar va blogerlar ishtirokida rasman taqdim etiladi.

Undan tashqari, Murodbek Atajanov pensiya yoshini oshirishda yumshoqroq variantni taklif etdi - pensiya yoshini yarim yil emas, balki uch oyga koʻtarish. Bu variantda pensiya yoshi har toʻrt yilda bir yilga oshadi va butun islohot 12 yil davomida amalga oshiriladi.

Oʻzbekistonda minimal pensiya yoshini oshirish rejalashtirilmoqda

Soliq siyosati: 2025 yilda asosiy soliq stavkalari oʻzgarishsiz qoldirilmoqda