Oʻzbekiston davlat qarzi $44 mlrdga yaqinlashdi

Oʻzbekistonning davlat qarzi 44 milliard dollarga yaqinlashdi. Bu haqda Iqtisodiyot va moliya vazirligining hisobotida maʼlum qilindi.

2025 yil 1 oktabr holatiga koʻra, mamlakatning jami davlat qarzi 43,97 milliard dollarni tashkil etdi. Bu koʻrsatkich oʻtgan yilning shu davriga nisbatan 4,9 milliard dollarga oshgan. Davlat qarzining YaIMga nisbati esa yil boshidagi 31,3 foizdan 32,3 foizgacha koʻtarilgan.

Qarzning asosiy qismi tashqi manbalar hisobiga shakllangan. Tashqi qarz hajmi 36,7 milliard dollar boʻlib, yil boshidan buyon qariyb 3 milliard dollarga koʻpaygan. Uning 20,35 milliard dollari qatʼiy foiz stavkasida, 16,1 milliard dollari esa oʻzgaruvchan foiz stavkasida jalb qilingan.

Shu davrda ichki qarz hajmi 7,2 milliard dollarni tashkil etgan.

Asosiy qarz beruvchilar kimlar?

Davlat tashqi qarzining $19,85 milliardlik qismi xalqaro moliya institutlaridan olingan. Bular quyidagilar:

• Jahon banki — $8 mlrd

• Osiyo taraqqiyot banki — $7,5 mlrd

• Osiyo infratuzilmaviy investitsiyalar banki — $1,73 mlrd

• Islom taraqqiyot banki — $932 mln

• Xalqaro valyuta jamgʻarmasi — $638 mln

• Yevropa tiklanish va taraqqiyot banki — $426 mln

• Boshqa institutlar (Qishloq xoʻjaligini rivojlantirish jamgʻarmasi, OPEK jamgʻarmasi, Yevropa investitsiya banki) — $598 mln

Shuningdek, tashqi qarzning 31 foizi yoki 11,2 mlrdlik qismi xorijiy hukumatlarga tegishli moliya tashkilotlari hisobiga toʻgʻri kelmoqda:

• Xitoy taraqqiyot davlat banki, Eksimbank va boshqalar — $3,76 mlrd

• Yaponiya xalqaro hamkorlik agentligi — $3,12 mlrd

• Fransiya taraqqiyot agentligi — $1,2 mlrd

• Koreya Eksimbanki va taraqqiyot jamgʻarmasi — $740 mln

• Germaniya davlat banki — $491 mln

• Saudiya taraqqiyot jamgʻarmasi — $134 mln

• Ispaniya davlat banki — $74 mln

• Turkiya Eskimbank — $27 mln (yangi kreditor)

• Boshqalar — $1,5 mlrd

Bundan tashqari, $5,84 milliardlik tashqi qarz xalqaro obligatsiyalar orqali investorlar tomonidan moliyalashtirilgan.

Qarz mablagʻlari qayerga yoʻnaltirilmoqda?

Davlat qarzi quyidagi sohalarga yoʻnaltirilmoqda:

• Byudjetni qoʻllab-quvvatlash — $17,4 mlrd (47%)

• Yoqilgʻi-energetika sanoati — $5,8 mlrd (16%)

• Qishloq va suv xoʻjaligi — $3,27 mlrd (9%)

• Uy-joy kommunal xoʻjaligi — $3,07 mlrd (8%)

• Transport va infratuzilma — $2,87 mlrd (8%)

• Sogʻliqni saqlash, taʼlim, axborot-kommunikatsiya texnologiyalari — $2,95 mlrd (8%)

• Tadbirkorlik va sanoat ishlab chiqarishni qoʻllab-quvvatlash — $664 mln (2%)

• Kimyo sanoati — $671 mln (2%)