11 fevral kuni “Startaplarni qoʻllab-quvvatlashning kompleks ekotizimini joriy etish chora-tadbirlari toʻgʻrisida”gi Prezident qarori qabul qilindi.

Qarorga muvofiq, 2026–2027 oʻquv yilidan boshlab oʻrta maxsus va professional taʼlim muassasalarida, shuningdek maktablarning yuqori sinflarida (9–11-sinflar) startap gʻoyalarini ishlab chiqishga qaratilgan “Biznes va mahorat soatlari” joriy etilishi rejalashtirilmoqda. Ushbu mashgʻulotlar oyiga kamida 2 marta oʻtkaziladi.

Har chorakda maktablar va texnikumlar oʻquvchilar tomonidan yaratilgan startap loyihalarini ota-onalar, biznes va ilmiy doiralar vakillariga taqdim etadi. Maktab startaplari mahsulotlari marketpleyslar orqali sotiladi.

Oʻquvchilar “Eng yaxshi startap gʻoyalari” tanlovlarida ishtirok etishlari mumkin boʻladi. Tuman bosqichi gʻoliblari 5 mln soʻm, hududiy bosqich gʻoliblari esa 10 mln soʻm mukofot oladi.

1 aprelga qadar davlat organlari, tashkilotlari va davlat sektori korxonalaridagi muammo va vazifalarni kraudsorsing asosida hal etishga moʻljallangan platformani ishga tushirish topshirildi. Har oyda tashkilotlar startap loyihalar mualliflari bilan uchrashuvlar (“Startap kunlari”) oʻtkazadi.

Shuningdek, talabalar startap loyihalarini qoʻllab-quvvatlashni kengaytirish vazifasi qoʻyilmoqda. Har yili eng katta startap yaratish salohiyatiga ega tashabbuslarni aniqlash maqsadida “Eng innovatsion gʻoya” tanlovi oʻtkaziladi.

Tanlov davlat oliy taʼlim muassasalarida oʻtkaziladi. Har bir davlat OTM’da gʻoliblar 100 mln soʻmlik grantlarga ega boʻladi. Respublika bosqichida tanlov 10 yoʻnalishni qamrab oladi va umumiy mukofot jamgʻarmasi 10 mlrd soʻmni tashkil etadi.

1 sentabrdan “Oliygohlar – startaplar generatori” dasturi start oladi. Uning doirasida OTMlar IT Park Uzbekistan va venchur fondlar bilan hamkorlikda talabalar akseleratorlarini tashkil etadi, ularga startap-menejerlar va startap-trekerlar jalb qilinadi.

Talabalar akseleratorlari va inkubatsiya markazlari orqali OTMlar talabalar va ilmiy xodimlar tomonidan ishlab chiqilgan istiqbolli startap loyihalarga 20 ming AQSh dollarigacha sarmoya kiritishi mumkin boʻladi. Shuningdek, yetakchi jahon akseleratorlari va universitetlari bilan stajirovka va almashinuv dasturlari yoʻlga qoʻyiladi.

Oʻzbekistonda maktab oʻquvchilari va talabalar uchun eng yaxshi startap gʻoyalari tanlovlari tashkil etiladi

Markaziy bank talabalar uchun mukofot qiymati 100 mln soʻmlik tanlov boshladi