Oʻzbekistonda oltin quymalari narxi ketma-ket ikkinchi kun rekord oʻrnatdi
13 yanvar kuni Oʻzbekistonda oltinning bir gramm narxi 1,84 mln soʻmga yetdi. Bu koʻrsatkich avvalgi kunga nisbatan 2,3 foizga yuqori. Oʻsish jahon bozoridagi rekord narxlar fonida kuzatilmoqda.
13-yanvar kuni Oʻzbekistonda oltin quymalari narxi yana tarixiy maksimumni qayd etdi. Markaziy bank maʼlumotlariga koʻra, bir gramm oltinning narxi 1 843 060 soʻmni tashkil etib, avvalgi kunga nisbatan 2,3 foizga oshdi.
Ayni paytda oltin quymalarining sotish va qaytarib sotib olish narxlari quyidagicha shakllangan:
13.01.2026
| Ogʻirligi | Sotish narxi |
Qaytarib sotib olish narxi | |
| qadogʻi but holatda | qadogʻi buzilgan yoki texnik talablarga mos kelmaydigan holatda | ||
5 gramm | 9 215 000 soʻm | 8 857 000 soʻm | 8 768 000 soʻm |
10 gramm | 18 431 000 soʻm | 17 715 000 soʻm | 17 536 000 soʻm |
20 gramm | 36 861 000 soʻm | 35 430 000 soʻm | 35 072 000 soʻm |
50 gramm | 92 153 000 soʻm | 88 574 000 soʻm | 87 680 000 soʻm |
100 gramm | 184 306 000 soʻm | 177 148 000 soʻm | 175 359 000 soʻm |
Jahon bozorida ham oltin narxi tarixiy rekordlarni yangilashda davom etmoqda. 12 yanvar kuni bir unsiya oltin narxi 4 600 AQSh dollarigacha koʻtarildi. Xabar tayyorlanayotgan paytda qimmatbaho metall 4 584 dollar atrofida savdo qilinmoqda.
Qimmatbaho metallarga boʻlgan talab AQSh prezidenti Donald Tramp va Federal rezerv tizimi (FED) rahbariyati oʻrtasidagi asosiy foiz stavkasi boʻyicha kelishmovchiliklar fonida kuchaymoqda. Tramp iqtisodiy faollikni tezlashtirish maqsadida pul-kredit siyosatini jadallik bilan yumshatishni talab qilmoqda.
FED raisi Jerom Pauell 11 yanvar kuni AQSh Adliya vazirligi tomonidan Vashingtondagi regulyator binosini rekonstruksiya qilish bilan bogʻliq holatlar yuzasidan unga nisbatan jinoyat ishi qoʻzgʻatilganini maʼlum qildi. Uning taʼkidlashicha, Tramp maʼmuriyati asosiy stavkani belgilashdagi mustaqil siyosat sabab Federal rezerv tizimiga bosim oʻtkazmoqda.
Shuningdek, AQSh mehnat bozorida eʼlon qilingan kutilganidan sust koʻrsatkichlar hamda dollar kursidagi bosim oltin narxining yanada oshishiga qoʻshimcha omil boʻlmoqda.
