Telegram мессенжери якшанба, 15 февраль куни 200 мингдан ортиқ гуруҳ ва каналларни блоклади. Бу ҳақда платформа статистик маълумотларида қайд этилган.

РИА Новости хабарига кўра, кун якунига келиб 235 282 та ҳамжамият блокланган. Бу январдан буён қайд этилган энг юқори кунлик кўрсаткич бўлиб, ўшанда чекловлар 300 840 та гуруҳ ва каналларга таъсир қилган эди.

1 февралдан буён Telegram 1,8 миллиондан ортиқ ҳамжамиятга киришни чеклаган, йил бошидан бери эса уларнинг умумий сони 7,2 миллиондан ошган. Шулардан қарийб 27,2 мингта канал террорчилик тарғиботи билан боғлиқ бўлган, дея маълум қилмоқда мессенжер.

Бир кун аввал Давлат думаси Ахборот сиёсати қўмитаси раиси Сергей Боярский Telegram раҳбарияти Роскомнадзор (RKN) билан алоқада эканини ва айрим материаллар талабга биноан ўчириб ташланаётганини айтганди. Парламентарий таъкидлашича, мессенжер Россия қонунчилигининг бир қатор талабларига ҳали ҳам риоя қилмаяпти, бироқ Боярский фикрича, Россия расмийлари билан муносабатларни йўлга қўйиш ва чекловларни олиб ташлаш учун Telegram’га “яна бир неча қадам олдинга ташлаш” қолган, холос.

10 февраль куни RKN матбуот хизмати Telegram’ни ҳам ўз ичига олган бир қатор мессенжерлар аввал эълон қилинган огоҳлантиришларга қарамай, қонун талабларини эътиборсиз қолдиришда давом этаётганини маълум қилди. 11 февраль куни Кремль матбуот котиби Дмитрий Песков Россияда Телеграмга нисбатан жорий этилган қонунчилик чоралари мажбурий эканини айтди. Шунингдек, у Кремль Telegram вакиллари билан бўлаётган алоқалардан хабардор эканини қўшимча қилди.

Аввалроқ Pinkod Россияда Telegram фаолиятига нисбатан янги чекловлар киритилиши мумкин эканлиги ҳақида ёзган эди.

Telegram бир кунда 200 мингдан ортиқ гуруҳ ва каналларни блоклади