OpenAI харажатларни оптималлаштириш мақсадида ChatGPT’нинг бепул ва айрим пулли тарифларида реклама жойлаштириш имкониятларини синовдан ўтказмоқда.

Режаларга кўра, рекламалар яқин ҳафталарда АҚШда фақат бепул ва Go тарифлари учун тест режимида ишга туширилади. Кейинчалик ушбу амалиёт глобал миқёсда ҳам жорий этилиши мумкин.

Компания маълумотига кўра, Pro, Business ва Enterprise каби юқори даражадаги обуналарда реклама кўрсатилмайди. Рекламалардан бутунлай воз кечмоқчи бўлган фойдаланувчилар айнан шу тарифлардан бирини танлашлари мумкин бўлади.

OpenAI реклама ChatGPT жавобларининг мазмунига ҳеч қандай таъсир кўрсатмаслигини алоҳида таъкидлади. Рекламалар аниқ белгиланган форматда, жавоблардан алоҳида жойлаштирилади ва фойдаланувчиларнинг суҳбатлари реклама берувчилар билан улашилмайди.

Шунингдек, компания 18 ёшдан кичик фойдаланувчиларга, шунингдек соғлиқ, руҳий саломатлик ва сиёсат каби нозик мавзулар билан боғлиқ контент ёнида реклама кўрсатилмаслигини билдирди.

OpenAI’нинг қайд этишича, реклама жорий этилишидан кўзланган асосий мақсад — сунъий интеллект воситаларидан кенгроқ фойдаланиш имконини яратиш, харажатларни оширмаслик ва платформага бўлган ишончни сақлаб қолишдир.

Компания, шунингдек, ChatGPT’ни фойдаланувчиларнинг платформада ўтказган вақти ёки фаоллигини ошириш учун оптималлаштирмаслигини, реклама даромадидан кўра фойдаланувчи тажрибасини устувор деб билишини таъкидлади.

Дастлабки реклама форматларини синовдан ўтказиш яқин вақт ичида бошланиши кутилмоқда. OpenAI эса фойдаланувчиларнинг фикр-мулоҳазаларига асосланиб реклама сиёсатини босқичма-босқич такомиллаштириб боришини маълум қилди.

ChatGPT’нинг бепул ва Go тарифларида реклама пайдо бўлиши мумкин