Иқтисодиёт ва молия вазирлигига тегишли бўлган Халқ банкининг 26,2 фоизлик улуши Миллий инвестиция жамғармасига ўтказилди. Бу ҳақда Корпоратив маълумотлар ягона порталида маълум қилинган.

Аввалроқ, 2025 йил 1 май куни Миллий инвестиция жамғармаси бошқаруви Franklin Templeton инвестиция гуруҳига топширилган эди. Ушбу халқаро компания Ўзбекистоннинг 1,7 миллиард долларлик давлат активларини глобал молия бозорларига олиб чиқиш ҳамда халқаро инвесторларни жалб этишни режалаштирмоқда.

Бундан ташқари, яна икки банк — Микрокредитбанкнинг 40 фоизлик ва Бизнесни ривожлантириш банкидаги 25 фоизлик давлат улушининг бир қисмини ҳам Жамғарма таркибига ўтказиш режалаштирилмоқда.

Миллий инвестиция жамғармаси ҳақида

Мазкур Жамғарма 2024 йил август ойида Президент қарорига асосан ташкил этилган бўлиб, унинг асосий мақсади — Ўзбекистон давлат активларини босқичма-босқич хусусийлаштириш, уларни етакчи хорижий фонд биржаларида жойлаштириш ҳамда халқаро инвесторларни жалб қилишдан иборат.