Qirgʻizistonda SpaceX kompaniyasiga tegishli Starlink sunʼiy yoʻldosh internet xizmati rasman ishga tushirildi.

Mazkur xizmat ayniqsa mamlakatning togʻli va chekka hududlari uchun muhim ahamiyatga ega. Chunki bunday hududlarda anʼanaviy internet infratuzilmasini qurish qimmat va murakkab hisoblanadi. Starlink esa internetni yerosti kabel tarmoqlari orqali emas, past Yer orbitasidagi sunʼiy yoʻldoshlar yordamida yetkazib beradi.

Shu sababli xizmat olis aholi punktlari, maktablar, tibbiyot muassasalari, turistik obʼektlar va fermer xoʻjaliklari uchun qoʻshimcha imkoniyat yaratishi mumkin.

Starlink xizmatida yuklab olish tezligi 135–305 Mbit/s, yuklash tezligi esa 20–40 Mbit/s oraligʻida boʻlishi mumkin. Biznes foydalanuvchilari uchun esa trafik hajmiga qarab alohida tariflar taklif etiladi.

Starlink’ning Qirgʻizistonda ishga tushirilishi Markaziy Osiyoda sunʼiy yoʻldosh interneti bozori kengayib borayotganini koʻrsatadi. SpaceX 2025 yil avgustida Qozogʻistonda xizmatni yoʻlga qoʻygan, 2026 yil fevralida esa Starlink Tojikistonda ham ishga tushirilgan edi.

Kompaniya 2026 yil oxirigacha Oʻzbekiston va Turkmanistonda ham xizmatni ishga tushirishni rejalashtirmoqda. Starlink xaritasida ushbu ikki mamlakat xizmat tez orada yoʻlga qoʻyilishi kutilayotgan davlatlar qatorida koʻrsatilgan.

Maʼlumotlarga koʻra, Starlink 2025 yil 6 avgust kuni “Starlink U-Stan” MChJ nomi bilan Oʻzbekistonda yuridik shaxs tashkil qilgan. Kompaniyaning ustav kapitali 400 mln soʻmni tashkil etadi.

Korxonaning 99 foiz ulushi Starlink Holding Netherlands B.V.ga, qolgan 1 foizi esa SpaceX Netherlands B.V.ga tegishli. Kompaniya rahbari sifatida Olimjon Davronovich Alimov koʻrsatilgan.

Qirgʻizistonda Starlink xizmati rasman ishga tushirildi