Brand Finance kompaniyasi dunyoning eng qimmatbaho brendlari boʻyicha keng qamrovli hisobotini eʼlon qildi. Reyting daromad, oʻsish va umumiy brend kuchi kabi omillarni hisobga olib tuzilgan. Roʻyxatning katta qismini Amerika kompaniyalari egallagan boʻlib, unda texnologiya sohasi yetakchilik qilmoqda.

1. Apple

Reytingning birinchi pogʻonasini Apple egalladi. Uning brend qiymati 574,5 milliard dollarni tashkil etadi. iPhone, MacBook va iPad kabi innovatsion mahsulotlari bilan mashhur boʻlgan Apple texnologiya sohasida global yetakchilikni saqlab qolmoqda.

2. Microsoft

Apple’dan keyingi oʻrinni yana bir texnologiya giganti – Microsoft egalladi, uning brend qiymati 461,1 milliard dollarga yetdi. Windows operatsion tizimi, Azure bulutli xizmatlari va mashhur Office dasturiy toʻplami orqali Microsoft oʻz taʼsirini va daromadini oshirishda davom etmoqda. Shuningdek, sunʼiy intellekt va bulutli texnologiyalarga qaratilgan strategik investitsiyalari uning bozordagi mavqeini yanada mustahkamlashga yordam bermoqda.

3. Google

Uchinchi oʻrinda Google joylashgan boʻlib, uning brend qiymati 413 milliard dollarni tashkil etadi. Dunyoning yetakchi qidiruv tizimi va raqamli reklama boʻyicha kuchli kompaniya sifatida Google internetning ajralmas qismiga aylangan. Android, AI va bulutli xizmatlarga sarmoya kiritilishi brendning dolzarbligini saqlab qolishga yordam bermoqda.

4. Amazon

Toʻrtinchi oʻrinda Amazon 356,4 milliard dollarlik brend qiymati bilan joylashgan. Dunyodagi eng yirik e-tijorat kompaniyasi boʻlgan Amazon’ning taʼsiri onlayn xarid qilishdan tashqariga ham kengaygan. Uning Amazon Web Services (AWS) bulutli xizmatlari global kompaniyalar uchun muhim infratuzilmani taʼminlaydi. Bundan tashqari, Amazon oʻzining koʻngilochar xizmatlari, logistika va sunʼiy intellektga asoslangan qurilmalari (Alexa) orqali innovatsiyalar markazida qolmoqda.

5. Walmart

Walmart 137,2 milliard dollarlik qiymati bilan beshinchi oʻrinni band qildi. Dunyoning eng yirik chakana savdo tarmogʻi boʻlgan Walmart raqamli davrga moslashib, onlayn savdo va logistika sohasida Amazon bilan raqobatlashib kelmoqda.

6. Samsung

Oltinchi oʻrinni esa Janubiy Koreyaning texnologiya giganti Samsung egalladi. Brend qiymati 110,6 milliard dollarni tashkil etuvchi mazkur kompaniya Apple’ning asosiy raqobatchisi hisoblanadi. Smartfon bozori, maishiy elektronika, yarimoʻtkazgichlar va displey texnologiyalaridagi muvaffaqiyatlari Samsung’ning global nufuzini saqlab qolishiga xizmat qilmoqda.

7. TikTok

Ijtimoiy tarmoqlarning oʻsishi davom etar ekan, TikTok 105,8 milliard dollarlik brend qiymati bilan yettinchi oʻrinni egalladi. Xitoyga tegishli boʻlgan qisqa video platformasi, ayniqsa, yosh foydalanuvchilar orasida tez rivojlanmoqda. AI asosida ishlovchi kontent tavsiyalari va global mashhurligi TikTok’ni raqamli koʻngilochar va reklama sohasida yetakchi brendga aylantirdi.

8. Meta

Meta (sobiq Facebook) hali ham kuchli mavqega ega boʻlib, 91,5 milliard dollar brend qiymati bilan sakkizinchi oʻrinni egalladi. Ijtimoiy tarmoq gigantining global taʼsiri Instagram va WhatsApp kabi platformalar bilan integratsiyasi orqali mustahkamlangan. Shuningdek, kompaniya virtual reallik va Metaverse loyihalariga sarmoya kiritib, raqamli kelajakni shakllantirishga harakat qilmoqda.

9. Nvidia

Toʻqqizinchi oʻrinni Nvidia 87,9 milliard dollarlik brend qiymati bilan egalladi. Yuksak unumdorlikka ega GPU ishlab chiqarishi bilan tanilgan Nvidia sunʼiy intellekt tadqiqotlari, avtonom avtomobillar va bulutli hisoblash sohalarida ham faoliyatini kengaytirmoqda. Bu esa uni zamonaviy texnologiyalarning ajralmas qismiga aylantirgan.

10. State Grid Corporation of China

Top-10 talikni Xitoyning Davlat elektr tarmoqlari korporatsiyasi (State Grid Corporation of China) yakunladi. Uning brend qiymati 85,6 milliard dollarga teng. Ushbu kompaniya mamlakatning eng yirik elektr taʼminoti kompaniyasi boʻlib, Xitoyning iqtisodiy rivojlanishi va infratuzilmasini quvvatlantirishda muhim rol oʻynaydi.

NVIDIA bozor qiymati bir kunda $270 mlrdga kamaydi

Dunyoning 10 ta eng qimmatbaho brendlari

Eng katta qulash: NVIDIA’ning bozor qiymati bir kunning oʻzida deyarli $600 mlrdga kamaydi