Prezident Shavkat Mirziyoyev raisligida birinchi chorak koʻrsatkichlarini tarmoq va hududlar kesimida tanqidiy tahlil qilish va yilning qolgan davrida qilinadigan ishlar muhokamasiga bagʻishlangan videoselektor yigʻilishi boʻlib oʻtmoqda.

Yigʻilishda taʼkidlanishicha, birinchi chorak yakuni bilan Oʻzbekiston yalpi ichki mahsuloti 8,7 foizga, sanoat 8 foizga, xizmatlar 16,1 foizga, qishloq xoʻjaligi 5,1 foizga oʻsdi. Eksport 5,8 milliard dollarni, xorijiy investitsiya hajmi esa 13,7 milliard dollarni tashkil qildi. Inflyatsiya esa yillik hisobda birinchi marta 7,1 foizgacha pasaydi.

Bularning hisobiga yanvar-mart oylarida byudjet daromadlari oʻtgan yilga nisbatan 35 foizga koʻpayib, 103 trillion soʻmga yetdi. Mahalliy byudjetlarda qoʻshimcha 2 trillion 200 milliard soʻm mablagʻ shakllandi. Shundan 1 trillion 400 milliard soʻm tuman va shaharlar ixtiyorida qoldi.

“Kelasi oy 2 milliard 400 million dollarlik davlat aktivlarining 30 foizini ilk bor xalqaro fond bozorlariga chiqaramiz. Bu Milliy investitsiya jamgʻarmasini tashkil qilib, 13 ta strategik korxona boshqaruvini nufuzli “Franklin Templeton” kompaniyasiga berganimiz uchun boʻlyapti.

Bir narsani bilinglar: iqtisodiyotimizni xalqaro miqyosda yangi darajaga olib chiqish uchun chuqur oʻylab, yakuniy qarorga kelganmiz”, – dedi davlat rahbari.

Oʻzbekiston iqtisodiyoti 2026 yil I choragida 8,7 foizga oʻsdi