Oʻzbekistonda dabdabali toʻylarni tartibga solish maqsadida aholiga bunday isrofgarchilikning zararli illat ekanini singdirish yoki maxsus “hashamat soligʻi” joriy etish taklifi bildirildi.

Bu haqda 16 yanvar kuni “Milliy tiklanish” demokratik partiyasi tomonidan oʻtkazilgan matbuot anjumanida partiya raisi Alisher Qodirov maʼlum qildi.

Uning taʼkidlashicha, partiya dabdabali toʻylarga nisbatan prinsipial pozitsiyaga ega va bu yondashuvdan voz kechmagan.

“Xalqimizning oʻzi tushunib yetishi kerak: xoʻjakoʻrsinga, boshqalarga nimanidir isbotlash uchun sarf-harajat qilish davri ortda qoldi. ʼKoʻrpaga qarab oyoq uzatish kerakʼ, degan naqlni toʻgʻri anglashimiz lozim. Hech kim boshqalarga koʻrinish uchun toʻy qilmasligi kerak. Daromadni faqat toʻylarga isrof qilish millatimizning eng ogʻriqli muammolaridan biridir”, — dedi Qodirov.

Siyosatchining fikricha, toʻy marosimlariga keladigan mehmonlar soniga qarab soliq joriy etilishi mumkin.

“Hashamatni xohlaysizmi — uning soligʻini ham hashamatli qilib toʻlang. Masalan, 10 ming kishini chaqirib toʻy qilmoqchisizmi? Unda har bir mehmon uchun belgilangan soliqni toʻlab qoʻying, shundan keyin xohlagancha odam bilan toʻy qiling”, — deya izoh berdi u.

Eslatib oʻtamiz, Alisher Qodirov 2021-yilgi prezidentlik saylovlari arafasida mehnat migrantlaridan ham soliq undirish taklifini ilgari surgandi.

Avvalroq Pinkod Oʻzbekistonda boy fuqarolarni soliqqa tortishning alohida tizimini yaratish rejalashtirilayotgani haqida xabar bergan edi.

Alisher Qodirov dabdabali toʻylar uchun “hashamat soligʻi” joriy etishni taklif qildi