Mobil aloqa foydalanuvchilari endilikda My.gov.uz portali orqali mobil raqamni boshqa shaxs nomiga onlayn tarzda qayta rasmiylashtirishi mumkin.

Avval ushbu jarayonni amalga oshirish uchun amaldagi raqam egasi va yangi egasi mobil aloqa operatori ofisiga shaxsan borishi, navbat kutishi hamda hujjatlarni imzolashi talab etilardi. Yangi xizmat orqali mazkur jarayon masofadan turib bajarilishi mumkin.

Xizmatdan foydalanish uchun My.gov.uz portali yoki MyGov mobil ilovasiga kirib, “Mobil raqamni qayta rasmiylashtirish” xizmatini tanlash, kerakli maʼlumotlarni toʻldirib ariza yuborish talab etiladi. Ariza berish jarayonida mobil raqam egasi hamda uni qabul qiluvchi shaxs MyID orqali arizani tasdiqlashi zarur.

Mazkur xizmat mobil aloqa operatorlari bilan hamkorlikda joriy etilmoqda. Xususan, quyidagi operatorlar ushbu imkoniyatni yoʻlga qoʻygan:

“Oʻzbektelekom” AK (Uztelecom)
“Unitell” MChJ XK (Beeline)
“RUBISON WIRELESS COMMUNICATION” MChJ (Perfectum)
“UMS” MChJ (Mobiuz)
“COSCOM” MChJ (Ucell)

Ushbu xizmat 22 apreldan boshlab kuchga kiradigan yangi tartiblar fonida joriy etilmoqda. Markaziy bank qaroriga koʻra, kredit va toʻlov tashkilotlarining mobil ilovalarida roʻyxatdan oʻtish hamda bank kartalarini ulashda foydalaniladigan telefon raqami foydalanuvchining oʻz nomida boʻlishi shart.

Agar mobil raqam shaxsning JShShIR maʼlumotlari bilan mos kelmasa, foydalanuvchini mobil ilovada roʻyxatdan oʻtkazish yoki bank kartasini ulash jarayoni rad etiladi. Biroq, telefon raqami quyidagi yaqin qarindoshlar nomida boʻlsa, bank ilovalaridan foydalanish mumkin:

ota-ona;
opa-singil;
turmush oʻrtogʻi;
farzand.

Yaʼni, yaqin qarindoshlar oʻrtasidagi holatlarda mazkur tartib muammo tugʻdirmaydi.

Endilikda mobil raqamni boshqa shaxs nomiga onlayn qayta rasmiylashtirish mumkin