Yanvar oyida Oʻzbekistonda narxlar qanday oʻzgardi?
Oziq-ovqat mahsulotlari narxi 2023 yil dekabrdan beri eng yuqori oʻsishni koʻrsatgan boʻlsa, pullik xizmatlar 2021 yildan beri eng yuqori koʻrsatkichga yetdi.
Statistika agentligi maʼlumotlariga koʻra, 2025 yil yanvar oyida Oʻzbekistonda isteʼmol narxlari indeksi (INI) 0,72% ga oshdi, bu 2023 yildan beri yilning birinchi oyi uchun eng yuqori koʻrsatkichdir. 2024 yil yanvarida INI 0,64% ni tashkil etgan edi. Yillik inflyatsiya 9,89% ga yetib, oʻtgan yilga nisbatan 1,31 foiz punktga koʻtarildi, ammo 2023 yildagi 12,19% dan pastroq darajada saqlanmoqda.
Oziq ovqat mahsulotlari
Oziq-ovqat mahsulotlari narxlari yanvar oyida 0,8% ga oshdi, bu 2023 yil dekabrdan beri eng yuqori oylik oʻsish hisoblanadi. Yillik oziq-ovqat inflyatsiyasi 2,6% ni tashkil etdi. Sabzavotlar narxi 6% ga, yogʻ-moy 1,5%, baliq mahsulotlari 1,1%, goʻsht 0,8%, ichimliklar 0,6%, tayyor mahsulotlar 0,4% ga qimmatlashdi. Ayni paytda tuxum 14,3%, mandarin 7,4%, sut mahsulotlari 3,5%, pomidor va bodring 1% ga arzonlashdi.
Eng keskin oʻsishlar baqlajonda (59,6%), kartoshkada (23,9%), bulgʻor qalampirida (13,2%), limonda (7,9%) va karamda (6,9%) kuzatildi. Yillik hisobda kartoshka 68,1%, sabzi 24,1%, paxta yogʻi 19,5%, kungaboqar yogʻi 18,1%, qoʻy goʻshti 16,2%, mol goʻshti 14,8% ga qimmatlashgan.
Xizmat koʻrsatish sohasi
Pullik xizmatlar narxi yanvar oyida 1,1% ga oshib, 2021 yildan beri eng yuqori koʻrsatkichga yetdi. Yillik oʻsish 27% ni tashkil etdi. Restoran xizmatlari 0,6% (yillik +11,7%), uy-joy ijarasi 0,6% (yillik +13,1%), mehmonxona xizmatlari 5,7% (yillik +10,7%), avtotransport xizmatlari 0,8% (yillik +11,2%) poyezd chiptalari 0,9% (yillik +13,2%) ga qimmatlashdi. Aviachiptalar narxi esa 1,3% ga pasaygan.
Sanoat tovarlari
Sanoat tovarlari narxlari yanvar oyida 0,3% ga oshib, yillik inflyatsiya 7,7% ni tashkil etdi. Maishiy texnika 0,3% (yillik 5,3%), elektrotexnika mahsulotlari 0,1% (yillik 1,7%), dori mahsulotlari 0,7% (yillik 25,2%) ga qimmatlashdi. Transport yoqilgʻisi narxlari orasida benzin 1,5% (yillik +3,9%), metan 0,1% pasaygan (yillik +20,9%), propan esa 13,2% arzonlashdi (yillik +8,3%).
Markaziy bankning prognoziga koʻra, 2025 yil davomida inflyatsiya 7-8% gacha pasayishi kutilmoqda.
