Январь ойида Ўзбекистонда нархлар қандай ўзгарди?

Статистика агентлиги маълумотларига кўра, 2025 йил январь ойида Ўзбекистонда истеъмол нархлари индекси (ИНИ) 0,72% га ошди, бу 2023 йилдан бери йилнинг биринчи ойи учун энг юқори кўрсаткичдир. 2024 йил январида ИНИ 0,64% ни ташкил этган эди. Йиллик инфляция 9,89% га етиб, ўтган йилга нисбатан 1,31 фоиз пунктга кўтарилди, аммо 2023 йилдаги 12,19% дан пастроқ даражада сақланмоқда.

Озиқ овқат маҳсулотлари

Озиқ-овқат маҳсулотлари нархлари январь ойида 0,8% га ошди, бу 2023 йил декабрдан бери энг юқори ойлик ўсиш ҳисобланади. Йиллик озиқ-овқат инфляцияси 2,6% ни ташкил этди. Сабзавотлар нархи 6% га, ёғ-мой 1,5%, балиқ маҳсулотлари 1,1%,  гўшт 0,8%, ичимликлар 0,6%, тайёр маҳсулотлар 0,4% га қимматлашди. Айни пайтда тухум 14,3%, мандарин 7,4%, сут маҳсулотлари 3,5%, помидор ва бодринг 1% га арзонлашди.

Энг кескин ўсишлар бақлажонда (59,6%), картошкада (23,9%),  булғор қалампирида (13,2%), лимонда (7,9%) ва карамда (6,9%) кузатилди. Йиллик ҳисобда картошка 68,1%, сабзи 24,1%, пахта ёғи 19,5%, кунгабоқар ёғи 18,1%, қўй гўшти 16,2%, мол гўшти 14,8% га қимматлашган.

Хизмат кўрсатиш соҳаси

Пуллик хизматлар нархи январь ойида 1,1% га ошиб, 2021 йилдан бери энг юқори кўрсаткичга етди. Йиллик ўсиш 27% ни ташкил этди. Ресторан хизматлари 0,6% (йиллик +11,7%), уй-жой ижараси 0,6% (йиллик +13,1%), меҳмонхона хизматлари 5,7% (йиллик +10,7%), автотранспорт хизматлари 0,8% (йиллик +11,2%)  поезд чипталари 0,9% (йиллик +13,2%) га қимматлашди. Авиачипталар нархи эса 1,3% га пасайган.

Саноат товарлари

Саноат товарлари нархлари январь ойида 0,3% га ошиб, йиллик инфляция 7,7% ни ташкил этди. Маиший техника 0,3% (йиллик 5,3%), электротехника маҳсулотлари 0,1% (йиллик 1,7%), дори маҳсулотлари 0,7% (йиллик 25,2%) га қимматлашди. Транспорт ёқилғиси нархлари орасида бензин 1,5% (йиллик +3,9%), метан 0,1% пасайган (йиллик +20,9%), пропан эса 13,2% арзонлашди (йиллик +8,3%).

Марказий банкнинг прогнозига кўра, 2025 йил давомида инфляция 7-8% гача пасайиши кутилмоқда.