Xiaomi 2025 yil birinchi choragida rekord darajada foyda oldi
Yakunlangan chorak davomida Xiaomi 111,3 milliard yuan (taxminan $15,5 mlrd) daromad koʻrdi. Bu oʻtgan yilgi koʻrsatkichdan 47 foizga koʻp boʻlib, mutaxassislarning oʻrtacha prognozidan ham yuqoridir.
Xitoyning Xiaomi kompaniyasi 27 may, seshanba kuni oʻzining birinchi chorak boʻyicha rekord darajadagi daromad va foyda olganini eʼlon qildi. Bu haqda Reuters xabar berdi.
Kompaniyaning aytishicha, u uzoq vaqtdan beri eʼtibor qaratayotgan yuqori darajadagi mahsulotlarga oʻtish strategiyasi oʻz samarasini bera boshlagan.
31 martda yakunlangan chorak davomida Xiaomi 111,3 milliard yuan (taxminan 15,5 milliard dollar) daromad koʻrdi. Bu oʻtgan yilgi koʻrsatkichdan 47 foizga koʻp boʻlib, mutaxassislarning oʻrtacha prognozidan ham yuqoridir.
Moslashtirilgan sof foyda esa ilk bor 10 milliard yuandan oshib, 10,7 milliard (taxminan $1,5 mlrd) yuanga yetdi — bu esa oʻtgan yilga nisbatan 65 foiz oʻsishni anglatadi. Ushbu natija ham analitiklarning kutganidan yuqori boʻldi.
Kompaniya prezidenti Lu Veybing jurnalistlar bilan suhbatda Xiaomi yuqori sifatli mahsulotlarga oʻtish orqali yaxshi natijalarga erishayotganini taʼkidladi.
Dunyodagi uchinchi yirik smartfon ishlab chiqaruvchisi hozirda avtomobil sohasiga ham kirib bormoqda. Oʻtgan haftada kompaniya oʻzining navbatdagi elektr krossoveri — YU7 modelini taqdim etdi.
Bu avtomobil iyul oyida savdoga chiqadi. Luning aytishicha, YU7 modeli oldingi SU7 ga qaraganda kengroq auditoriyaga moʻljallangan boʻlishi mumkin. Kompaniya hali narxni oshkor qilmagan, biroq yuqori konfiguratsiyalari tufayli u Tesla’ning eng koʻp sotiladigan Model Y avtomobillaridan taxminan $8,300 dan $9,700 gacha qimmatroq boʻlishi mumkinligi aytilayotgandi. Maʼlumot uchun, Tesla Model Y narxi $36,574 dan boshlanadi.
