UzNIF’ning sof aktivlari qiymati 2,63 mlrd dollarga yetdi

Oʻzbekiston Milliy investitsiya jamgʻarmasi (UzNIF) 2026 yil iyun oyi yakunlari boʻyicha sof aktivlari qiymatini — NAV koʻrsatkichini eʼlon qildi.

30 iyun holatiga jamgʻarmaning sof aktivlari qiymati 31 trln 670 mlrd soʻm yoki 2,63 mlrd dollarni tashkil etgan. Bu may oyi yakuniga nisbatan 8,5 foizga koʻpdir.

Hisob-kitoblarga koʻra, bir oy ichida UzNIFning sof aktivlari taxminan 2,5 trln soʻm yoki 206 mln dollarga oshgan.

Jamgʻarmaning bitta oddiy aksiyasiga toʻgʻri keladigan sof aktivlar qiymati 6,27 soʻmni, bitta global depozitar tilxat — GDR uchun esa 33,61 dollarni tashkil etdi. Hisob-kitoblarda Markaziy bankning 30 iyundagi rasmiy valyuta kursidan foydalanilgan.

UzNIF maʼlumotiga koʻra, NAV oʻsishi asosan birjada sotilmaydigan hamda likvidligi past boʻlgan ayrim kompaniyalardagi ulushlarning adolatli qiymati yangilangani bilan bogʻliq.

Baholash mustaqil baholovchi ishtirokida tayyorlangan hisobotlar asosida amalga oshirilgan. Bunda kompaniyalarni baholash metodologiyasi oʻzgarmagan, biroq hisob-kitoblarda foydalanilgan koʻrsatkichlar va taxminlar yangilangan.

Shu bilan birga, eʼlon qilingan xabarda UzNIF portfelidagi har bir kompaniyaning alohida qiymati keltirilmagan. Yaʼni qaysi kompaniyadagi ulush qayta baholanish hisobiga qancha qimmatlashgani hozircha ochiqlanmagan.

UzNIF portfeliga 13 ta yirik davlat kompaniyasidagi 25 foizdan 40 foizgacha boʻlgan strategik ulushlar kiritilgan. Jamgʻarma aktivlarini Franklin Templeton kompaniyasining Oʻzbekistondagi tuzilmasi boshqaradi.

Jamgʻarma NAVdagi oʻzgarishlarning asosiy omillari 2026 yilning birinchi yarmi yakunlariga bagʻishlangan investorlar bilan uchrashuvda batafsil muhokama qilinishini maʼlum qilgan.