Trastbank ustav kapitalini ikki baravar oshirib, 2 trln soʻmga yetkazadi

Trastbank kuzatuv kengashi 23 iyuldagi yigʻilishda bank ustav kapitalini 1 trln 250 mln soʻmga oshirish toʻgʻrisida qaror qabul qildi. Natijada uning ustav kapitali 1 trln 250 mln soʻmdan 2 trln 500 mln soʻmga yetadi.

Emissiya doirasida nominal qiymati 1 ming soʻmdan 1 mlrd 227 mingta oddiy hamda 23 mingta imtiyozli aksiya chiqariladi. Qoʻshimcha aksiyalarning umumiy qiymati 1 trln 250 mln soʻmni tashkil etadi.

Barcha aksiyalar bankning amaldagi aksiyadorlari oʻrtasida ularga tegishli aksiyalar soniga mutanosib ravishda taqsimlanadi. Yaʼni har bir eski aksiya uchun bittadan yangi aksiya beriladi. Natijada aksiyadorlarning bankdagi ulushi oʻzgarmaydi.

Aksiyalar yopiq obuna orqali birjadan tashqari uyushmagan bozorda joylashtiriladi. Emissiya jarayoniga anderrayterlarni jalb qilish rejalashtirilmagan.

Qoʻshimcha aksiyalarni oladigan aksiyadorlar roʻyxati emissiya davlat roʻyxatidan oʻtkazilganidan keyingi beshinchi ish kuni holatiga shakllantiriladi. Joylashtirish oltinchi ish kuni boshlanib, 60 kundan kechiktirmasdan yakunlanishi kerak.

Aksiyalar qiymati bankning oʻtgan yillardan qolgan taqsimlanmagan foydasini kapitalizatsiya qilish orqali qoplanadi. Shu sababli operatsiya bankning jami xususiy kapitalini 1 trln 250 mln soʻmga oshirmaydi. Mablagʻ taqsimlanmagan foydadan ustav kapitaliga oʻtkaziladi.

Markaziy bank maʼlumotiga koʻra, 2026 yil 1 iyul holatida Trastbank aktivlari bir yilda 38,2 foizga oshib, 17,7 trln soʻmga yetgan. 

Shu davrda uning kredit portfeli 36,2 foizga oʻsib, 8,7 trln soʻmni, depozitlari esa 35,7 foizga koʻpayib, 12,1 trln soʻmni tashkil etgan.