Telegram’da shaxsiy chatlarda xabarlarni uzatishni cheklash funksiyasi ishga tushirildi

Telegram messenjerining yangi versiyasi taqdim etildi. Bu safargi yangilanish guruh aʼzolarining oʻzini tanitishiga yordam beradigan teglar, ayrim shaxsiy chatlarda xabarlarni ulashishni oʻchirib qoʻyish sozlamasi, GIF tahrirlash va ularga izoh qoʻshish, Telegram orqali ilova va veb-saytlarga roʻyxatdan oʻtish hamda kirish uchun yangi vositalar va boshqalarni oʻz ichiga oldi. 

Guruhlardagi aʼzo teglari

Endi guruh chatlari ishtirokchilari oʻz ismi yoniga teg qoʻshishlari mumkin. Bu ish jamoadagi lavozim yoki rol, universitetdagi mutaxassislik va boshqalar boʻlishi mumkin. Masalan, qoʻshnilar bilan suhbatda kvartira yoki mashinani koʻrsatish yoki onlayn hamjamiyatda oʻz qiziqishlarini bildirish mumkin.

Administratorlar teg qoʻshishni sozlashi mumkin — bu huquqni oʻzida qoldirishi yoki ishtirokchilarga ism yonidagi tegni oʻzlari tanlashiga ruxsat berishni oʻz ichiga oladi. Administratorlarning teglari har doim rang bilan ajralib turadi, shunda ularning guruhdagi roli tegdagi matndan qatʼi nazar darhol tushunarli boʻladi.

Guruh aʼzolariga ism yonidagi tegni mustaqil ravishda qoʻshishga ruxsat berish uchun guruh sozlamalari > Ruxsatlar rukniga kirish va Tegni tahrirlash bandini yoqish kerak.

Shaxsiy chatlarda xabar uzatishni cheklash

2021 yilda Telegramda guruhlar va kanallardagi kontentni himoya qilish sozlamalarini taqdim etgan edi. Ular hamjamiyatlar va mualliflarga nashrlar eksklyuzivligini saqlashga yordam beradi.

Bugungi yangilanishdan boshlab, foydalanuvchilar oʻzaro ishonch muhitini yaratish maqsadida istalgan shaxsiy chatdagi maʼlumotlarni ulashish imkoniyatini ham oʻchirib qoʻyishi mumkin.

Agar chatda nusxa olish taqiqlangan boʻlsa, suhbatdoshlar undagi xabarlarni boshqalarga yubora olmaydi va nusxalay olmaydi, shuningdek, skrinshot qila olmaydi hamda mediafayllarni saqlab ololmaydi.

Mazkur funksiya hozircha faqatgina Telegram Premium obunachilari uchun mavjud.

GIF uchun izohlar

Endi GIF panelidan animatsiya tanlayotganda, unga darhol izoh qoʻshish va barchasini bitta xabarda yuborish mumkin. Boshqa mediafayllardagi kabi, memlaringiz mukammal koʻrinishi uchun izohni GIF’ning ustiga yoki ostiga joylashtirish mumkin.

Imzo qoʻshish uchun paneldagi kerakli GIF animatsiyani bosib turib, “Imzo qoʻshish” bandini tanlash kerak.

Suratlardan stikerlarni tezkor yaratish

Endi Telegramda koʻrgan suratlaringizni birgina bosish bilan stikerga aylantirish mumkin. Stikerlarni yuborishdan oldin ularni tahrirlash mumkin. Bular obʼektlarni kesish, matn yoki emoji qoʻshish va boshqalarni oʻz ichiga oladi.

Yaratilgan stikerni stikerlar panelidagi Saralanganlarga saqlash yoki darhol toʻplamga qoʻshish mumkin.

GIF va stikerlarni tahrirlash

Endi paneldagi GIF va stikerlarni Telegram’ning kuchli media muharriri orqali tahrirlash mumkin — ularga matn, chizmalar va emoji qoʻshish, shuningdek GIF’larni qisqartirish yoki uzunligini oʻzgartirish mumkin.

GIF yoki stikerni tahrirlash uchun uni bosib ushlab turing va “Edit” (Tahrirlash) ni tanlang.

Soʻrovnomalar uchun vaqt belgisi (Timestamp)

Ovozlar koʻrinadigan soʻrovnomalarda endi har bir foydalanuvchining qachon ovoz bergani koʻrsatiladi. Bu ishtirokchilarga har bir ovoz qachon berilganini koʻrish imkonini beradi.

Botlar uchun jonli (streaming) javoblar

Oʻtgan yili TelegramAI botlarga javobni yozish jarayonida matnni bosqichma-bosqich koʻrsatish imkoniyatini bergan edi. Bugungi yangilanish bilan har qanday bot ushbu funksiyani yoqishi mumkin — bu esa javoblarning ekranda silliq va jonli tarzda paydo boʻlishini taʼminlaydi.

Telegram orqali tizimga kirish (Log In With Telegram)

Endi Telegram akkaunt orqali ilova va saytlar roʻyxatdan oʻtish yoki tizimga kirishni bir necha bosishda amalga oshirish mumkin — forma toʻldirish yoki parol yaratish shart emas.

Qoʻshimcha tasdiqlash bosqichlaridan qochish uchun telefon raqamingizni ulashish, shuningdek, xizmatlarga Telegram orqali sizga xabar yuborishga ruxsat berish imkoniyati ham mavjud.

Dasturchilar “Log In With Telegram” funksiyasini integratsiya qilish boʻyicha batafsil qoʻllanmani koʻrib chiqishlari mumkin.

Vaqt va sana formatlash

Endi xabarda aniq vaqt va sanani yuborish uchun yangi “Date” (Sana) formatlash opsiyasidan foydalanish mumkin. Qabul qiluvchilar unga bosib, voqeani kalendariga qoʻshishlari yoki tezkor eslatma oʻrnatishlari mumkin.

Sana formati avtomatik ravishda har bir qabul qiluvchining mahalliy vaqt zonasiga moslashadi — shuning uchun hech kim vaqt farqini hisoblab oʻtirmaydi.

Botlar yuborgan xabarlarda ham dinamik vaqt oʻzgaruvchilaridan foydalanish mumkin, bu foydalanuvchiga uning vaqt zonasiga mos aniq sana va vaqtni koʻrsatadi.