Telegram ishlashida global uzilishlar qayd etildi
Downdetector maʼlumotlariga koʻra, Rossiya, Oʻzbekiston, Germaniya, Niderlandiya va AQShda foydalanuvchilar xabar yuborish hamda media fayllarni yuklashda muammolarga duch kelmoqda. Nosozlik sabablari hozircha rasman maʼlum qilinmagan.
Telegram messenjerida keng koʻlamli nosozlik kuzatilmoqda. Bu haqda turli davlatlar, jumladan Rossiya va Markaziy Osiyo mamlakatlaridagi foydalanuvchilar xabar bermoqda. Nosozliklar haqidagi maʼlumotlar Downdetector xizmatida ham qayd etilgan.
Foydalanuvchilar shikoyatlariga koʻra, servis barqaror ishlamayapti: matnli xabarlarni yuborish, fotosuratlar, videolar hamda boshqa mediafayllarni yuklashda qiyinchiliklar yuzaga kelmoqda.
Muammolar haqida xabarlar turli shahar va hududlardan kelib tushmoqda. Bu esa Telegram infratuzilmasi yoki uning ayrim komponentlarida nosozlik yuzaga kelgan boʻlishi mumkinligini koʻrsatadi.
Xabar berilishicha, muammo faqat Rossiyada emas — Oʻzbekiston, Germaniya, Niderlandiya hamda AQShdagi foydalanuvchilar ham messenjer ishlashida uzilishlar kuzatilayotganini bildirgan.
Maqola eʼlon qilingan paytda nosozlik sabablari rasmiy ravishda maʼlum qilinmagan.
