Telegram Android uchun yirik interfeys-dizayn yangilanishini taqdim etdi

Telegram 2026 yildagi ikkinchi yirik yangilanishini taqdim etdi. Bu Android foydalanuvchilari uchun Telegram tarixidagi eng katta interfeys redizayni boʻldi.

Keng koʻlamli redizayn

Telegramʼning Android versiyasida interfeys toʻliq yangilandi. Yangi pastki panel yordamida chatlar, sozlamalar, profil va boshqa boʻlimlar oʻrtasida bir zumda almashish mumkin.

Android-dasturchilar dizaynni yangilabgina qolmay, interfeys kodini ham toʻliq qayta yozishdi. Bu esa ilovaning har qanday qurilmada silliq va barqaror ishlashini taʼminlaydi.

Telegram endilikda IOS va Android versiyalarda deyarli bir xil dizayndan foydalanmoqda. 

Agar foydalanuvchi unumdorlikni oshirish va batareya quvvatini tejashni istasa, Sozlamalar > Energiya tejash boʻlimida animatsiyalar va vizual effektlarni oʻchirib qoʻyish mumkin.

iOS versiyasida esa “suyuq shisha” (liquid glass) effektlari yanada kengaytirildi. Oʻzgarishlar foto va video koʻrish oynalari, stikerlar va emodzi panellari, shuningdek profil va xabarlardagi kontekst menyulariga ham taalluqli.

iPad qurilmalari uchun yangi klaviatura sozlamasi qoʻshildi — endi xabarlarni ⌘ + Enter tugmalar kombinatsiyasi orqali yuborish mumkin.

Guruhdan chiqishda huquqlarni topshirish

Agar guruh egasi uni tark etsa, bir hafta oʻtgach barcha huquqlar avtomatik ravishda administratorlardan biriga oʻtkaziladi.

Endi guruhdan chiqishda tasdiqlash oynasi paydo boʻladi — unda egasi xohlasa, oʻz oʻrniga yangi egani darhol tanlashi mumkin.

Endi guruh va kanal egalari oʻz huquqlarini istalgan vaqtda boshqa ishtirokchiga topshirishlari mumkin. Buning uchun chatni tark etish shart emas.

Sovgʻalar tayyorlash

Kolleksion sovgʻalar ishga tushirilganidan beri Telegram foydalanuvchilari 100 dan ortiq kolleksiyalardagi millionlab sovgʻalarni noyob NFT’larga aylantirdi.

Yangi mexanizm mavjud sovgʻalarni birlashtirish orqali noodatiy, noyob, epik yoki afsonaviy variantlarni yaratish imkonini beradi. Yangi sovgʻalar oʻziga xos dizayn va vizual effektlarga ega boʻladi.

Tayyorlash jarayonida 4 tagacha sovgʻadan foydalanish mumkin. Har bir qoʻshimcha sovgʻa muvaffaqiyat ehtimolini oshiradi. Bir xil xususiyatga ega sovgʻalardan foydalanish yakuniy mahsulotda shu xususiyat paydo boʻlish ehtimolini kuchaytiradi.

Telegram ichidagi marketpleys orqali sovgʻalarni xavfsiz sotib olish va sotish imkoniyati mavjud.

Botlar uchun rangli tugmalar

Endi bot ishlab chiquvchilar tugmalarni ranglar va emodjilar bilan bezatishlari mumkin. Bu interfeysni yanada tushunarli qilish yoki muhim harakatlarga foydalanuvchi eʼtiborini jalb etish imkonini beradi.

Botlar uchun soʻnggi yangilanishlar haqida batafsil maʼlumotni Bot API oʻzgarishlar roʻyxatida topish mumkin.