Telegram 12 yilligiga chiqarilgan sovgʻalar uch daqiqada sotilib, $11 mln daromad keltirdi
Cheklangan kolleksiyaga kirgan oltita turdagi mahsulot orasida eng talabgir ikki sovgʻa atigi 15 soniyada sotilib ketdi.
Telegram messenjeri 12 yillik “tugʻilgan kuni” munosabati bilan oltita turdagi, umumiy 965 ming dona kolleksion sovgʻalarni sotuvga chiqardi. Kompaniya asoschisi Pavel Durovning yozishicha, mahsulotlar sotuv boshlangach atigi uch daqiqa ichida xarid qilingan.
Eng koʻp talabga ega boʻlgan ikki mahsulot — Durov’s Sunglasses va Resistance Dog sotuvga chiqqanidan 15 soniya oʻtmay sotilib ketdi. Ular faqat Premium obunachilar uchun moʻljallangan boʻlib, cheklangan miqdorda ishlab chiqarilgan.
Durov’s Sunglasses — 30 ming Stars (7 million soʻmdan ortiq) narxda 5 ming dona ishlab chiqarilgan va eng qimmat sovgʻa boʻldi.
Resistance Dog esa 5 ming Stars (tahminan 1,1 mln soʻm) narxda sotuvga qoʻyilib, 20 ming dona chiqaruv bilan cheklangan. Ikkala NFT mahsuloti ham sotuvga qoʻyilgach soniyalar ichida tugagan.
Telegram jami oltita turdagi sovgʻani uch daqiqa ichida sotish orqali $11 milliondan ortiq daromad oldi.
Kolleksiyadagi boshqa sovgʻalar orasida qumli qalʼa, syorfing taxtasi va pushti flamingo kabi virtual buyumlar ham bor edi. Ularning barchasi sotuvga chiqarilganidan soʻng juda qisqa vaqt ichida xarid qilindi.
Avvalroq Pinkod Snoop Dogg va Telegram hamkorligidagi NFT kolleksiyasi yarim soat ichida sotilib ketgani haqida yozgan edi.
Pavel Durovga koʻra, platforma NFT sotuvidan $12 mln daromad olgan.
