“Tadbirkorlikni rivojlantirish kompaniyasi” AJ Infinbank’dagi ulushini 23 foizgacha oshirdi

“Tadbirkorlikni rivojlantirish kompaniyasi” AJ Infinbank ustav kapitalidagi ulushini 23 foizgacha yetkazdi. Bu haqda Korporativ maʼlumotlar yagona portalida eʼlon qilingan maʼlumotlarda keltirilgan.

Maʼlum qilinishicha, 29 dekabr kuni jamiyatning 10 foizdan ortiq ulushga ega aksiyadorlari roʻyxatida oʻzgarishlar qayd etilgan. Natijada “Tadbirkorlikni rivojlantirish kompaniyasi” AJning Infinbankʼdagi ulushi 23 foizni tashkil etgan.

Kompaniyaning Infinbank ustav kapitaliga kirishi 2025 yil oktabr oyida amalga oshirilgan boʻlib, dastlab 15 foiz aksiya sotib olingan. Keyinchalik ushbu ulush 19 foizgacha oshirilgan. Dekabr oyiga kelib esa kompaniyaning bankdagi ulushi 23 foizga yetdi.

Ayni paytda “Tadbirkorlikni rivojlantirish kompaniyasi” AJ quyidagi tashkilotlarda 10 foizdan ortiq ulushga egalik qiladi:

• “Xamroh” ayollar tadbirkorligini qoʻllab-quvvatlash kompaniyasi MChJ — 100 foiz
• “UZAGROSTAR HOLDING” — 100 foiz
• “OLIS OSMON” MChJ — 21 foiz
• TRK Invest MChJ — 100 foiz
• “Biznes Kafolatlari MChJ” — 100 foiz
• Infinbank AJ — 23 foiz

Maʼlumot uchun, 2023 yil 10 noyabrda qabul qilingan “Kichik va oʻrta biznesni moliyaviy qoʻllab-quvvatlash tizimini takomillashtirish chora-tadbirlari toʻgʻrisida”gi Prezident farmoniga muvofiq, Tadbirkorlik faoliyatini qoʻllab-quvvatlash davlat jamgʻarmasi “Tadbirkorlikni rivojlantirish kompaniyasi” sifatida qayta tashkil etilgan. Kompaniyaning taʼsischisi Iqtisodiyot va moliya vazirligi hisoblanadi.