Starlink sunʼiy yoʻldosh interneti Qozogʻistonda ishga tushdi
Qozogʻistonda abonent toʻlovi oyiga taxminan 50–60 dollar, uskunaning oʻzi esa 500 dollarga yaqin boʻlishi kutilmoqda.
SpaceXʼning shoʻba kompaniyasi Starlink Qozogʻistonda sunʼiy yoʻldosh orqali yuqori tezlikdagi internet xizmatlarini taqdim etishni boshladi.
Bu haqda Qozogʻiston Raqamli rivojlanish, innovatsiyalar va aerokosmik sanoat vazirligi (Raqamli vazirlik) matbuot xizmati xabar berdi.
2025 yil 13 avgustdan boshlab, Starlink Qozogʻiston Respublikasi hududida rasmiy ravishda xizmat koʻrsatishni boshladi. Bu orqali past orbitadagi SpaceX sunʼiy yoʻldoshlari orqali yuqori tezlikli va ishonchli internetga ulanish imkoniyati yaratiladi.
Raqamli vazirlik rahbari Jaslan Madiyev ijtimoiy tarmoqlarda:
"Bir yil davomida biz Starlink hamda davlat xizmatlari va regulyatorlari pozitsiyalarini yaqinlashtirish boʻyicha muzokaralar olib bordik. Bugun Starlink Qozogʻistonni rasmiy ishtirok xaritasiga qoʻshdi", — deya taʼkidladi.
2025 yil 12 iyunda vazirlik bilan Starlink kompaniyasi oʻz xizmatlarida respublika qonunchiligiga rioya qilish majburiyatini mustahkamlovchi kelishuv imzolagan.
Hozirda Starlink dunyoning 100–130 ta davlat va hududida faoliyat yuritib, foydalanuvchilarga yuqori tezlikli internet xizmatlarini taklif etadi. Starlink antennasi orqali internet tezligi oʻrtacha 150–200 Mbit/sni tashkil qiladi.
Qozogʻistonda abonent toʻlovi oyiga taxminan 50–60 dollar, uskunaning oʻzi esa 500 dollarga yaqin boʻlishi kutilmoqda.
