Soliq qoʻmitasi xarid cheklarining soddalashtirilgan shaklini joriy etdi
Yangi shaklda faqat xarid qilingan mahsulot yoki xizmat nomi, uning narxi va chekning yakuniy summasi koʻrsatiladi. Foydalanuvchilar elektron chekni toʻliq shaklda ham koʻrishi mumkin.
Soliq qoʻmitasi elektron fiskal cheklarni toʻliq yoki soddalashtirilgan shaklda koʻrish imkoniyatini joriy etdi. Yangi formatda faqat xarid qilingan mahsulot yoki xizmat nomi, uning narxi hamda chekning umumiy summasi koʻrsatiladi.
Avval elektron cheklarda MXIK kodi, oʻlchov birligi, QQS summasi, chegirmalar, soliq stavkalari va boshqa rekvizitlar birgalikda aks ettirilardi. Bu maʼlumotlar soliq nazorati uchun zarur boʻlsa-da, xaridorning chekdagi asosiy hisob-kitobni tezda tushunishini qiyinlashtirishi mumkin edi.
Endi foydalanuvchi chekni ochganda uning toʻliq yoki soddalashtirilgan koʻrinishini mustaqil tanlay oladi. Formatlar oʻrtasida istalgan vaqtda almashish mumkin.
Bunda toʻliq chekdagi maʼlumotlar oʻchirib tashlanmaydi. MXIK kodlari, QQS, chegirmalar va boshqa fiskal rekvizitlar saqlanib qoladi hamda toʻliq koʻrinishda mavjud boʻladi.
Shuningdek, elektron chek nusxasini qurilmaga saqlash va boshqa foydalanuvchilarga yuborish imkoniyati ham mavjud.
Elektron fiskal chekni smartfon kamerasi orqali undagi QR-kodni skanerlash yoki “Soliq” mobil ilovasidan foydalanish orqali tekshirish mumkin.
