Qayta hisob-kitoblardan soʻng Oʻzbekiston Yalpi ichki mahsuloti $121,4 mlrdga yetdi

Oʻzbekistonning 2024-yil yakuni boʻyicha yalpi ichki mahsuloti (YaIM) qayta hisoblash natijasida $121 mlrddan oshdi. Bu haqda Milliy statistika qoʻmitasi matbuot xizmati maʼlum qildi.

17-noyabr kuni Toshkentda oʻtkazilgan xalqaro konferensiya va matbuot anjumanida qoʻmita raisi Behzod Hamrayev qayta hisoblash natijalari va yangilangan makroiqtisodiy koʻrsatkichlar boʻyicha maʼlumot berdi.

Yakuniy hisob-kitoblarga koʻra, 2024-yil uchun YaIMning nominal hajmi amaldagi 1 454,6 trln soʻmdan 1 535,4 trln soʻmga (80,9 trln soʻmga) yoki 5,6% ga oshirildi. Natijada mamlakat YaIMi AQSh dollari hisobida $115 mlrddan $121,4 mlrdga yetdi.

Qayta baholash shuningdek aholi jon boshiga toʻgʻri keladigan YaIM koʻrsatkichini 41,3 mln soʻm etib belgiladi. Davlat byudjeti ijrosining toʻliq qamrab olinishi hisobiga 36,4 trln soʻmlik yangi qoʻshilgan qiymat aniqlangan.

Sohalar kesimida qaralganda:

• sanoat boʻyicha qoʻshimcha 12,7 trln soʻm,
• qishloq xoʻjaligida 5,6 trln soʻm,
• qurilishda 10,3 trln soʻm,
• xizmatlar sohasida esa 16,3 trln soʻmlik qoʻshilgan qiymat qayta hisoblandi.

Malumot uchun, yanvar–sentabr oylari yakuniga koʻra, mamlakat YaIMI 1,3 kvadrillion soʻmdan ($108,73 mlrd) oshdi, real oʻsish surʼati esa 7,6% ni tashkil qilgan.