Oʻzbekistonda ilk pulli yoʻllar 2027 yilda ishga tushiriladi
“Oʻzbekiston–2030” strategiyasiga muvofiq, mamlakatda ilk pulli avtomobil yoʻllarini bosqichma-bosqich joriy etish rejalashtirilgan.
Dastlabki 50 kilometrlik yoʻl 2027 yilda ishga tushirilishi, 2030 yilga borib esa pulli yoʻllarning umumiy uzunligi 130 kilometrga yetkazilishi koʻzda tutilmoqda.
Avvalroq yangilangan “Oʻzbekiston–2030” strategiyasi qabul qilingani haqida xabar berilgandi.
Hujjatda mamlakatning global transport-logistika tarmoqlariga integratsiyasini chuqurlashtirish hamda milliy transport tizimi salohiyatini oshirish boʻyicha qator muhim vazifalar belgilangan.
Strategiyaga koʻra, Toshkent – Samarqand, Toshkent – Fargʻona vodiysi va boshqa yoʻnalishlarda umumiy uzunligi 130 kilometr boʻlgan pulli avtomobil yoʻllarini qurish rejalashtirilgan. Biroq 2026 yilda birorta yoʻnalish boʻyicha yoʻllar toʻliq foydalanishga topshirilmaydi.
Dastlabki bosqichda 2027 yilda 50 kilometrlik yoʻl uchastkasi ishga tushirilishi kutilmoqda.
Shundan soʻng loyiha bosqichma-bosqich kengaytirilib, 2028 yilga kelib pulli yoʻllar uzunligi 75 kilometrga, 2029 yilda 100 kilometrga yetkaziladi. 2030 yilga borib esa ularning umumiy uzunligi 130 kilometrni tashkil etishi rejalashtirilgan.
Strategiyada aynan qaysi yoʻnalishda birinchi pulli yoʻl ishga tushirilishi aniq koʻrsatilmagan. Hujjatga muvofiq, yoʻllar xususiy sektor mablagʻlari hisobidan barpo etiladi. Loyiha ijrosi uchun masʼul organ etib Transport vazirligi belgilangan.
