Oʻzbekistonda har uchinchi ipoteka krediti Toshkent shahriga toʻgʻri kelmoqda
2026 yilning dastlabki besh oyida Oʻzbekistonda 34,7 ming nafar fuqaroga 10,6 trln soʻmlik ipoteka krediti ajratildi. Kreditlash hajmi bir yil avvalgi mos davrga nisbatan 32,5 foizga oshgan boʻlib, mablagʻlarning 76 foizi yangi uy-joylar xaridiga yoʻnaltirilgan.
Markaziy bank maʼlumotlariga koʻra, ajratilgan ipoteka kreditlarining 8 trln soʻmi yoki 76 foizi birlamchi uy-joy bozoriga yoʻnaltirilgan. Ushbu mablagʻlar hisobidan 26 495 nafar fuqaro yangi qurilgan uy-joylarni xarid qilgan.
Ikkilamchi bozordan uy sotib olish uchun esa 8 268 nafar fuqaroga 2,6 trln soʻmlik kredit berilgan. Bu jami ipoteka kreditlarining 24 foiziga teng.
Ipotekaning oʻrtacha summasi 305 mln soʻmdan oshdi
Besh oy davomida ajratilgan ipoteka kreditlari hajmi va qarz oluvchilar sonidan kelib chiqilsa, bir fuqaroga toʻgʻri kelgan oʻrtacha kredit miqdori qariyb 305 mln soʻmni tashkil etgan.
Kredit oluvchilarning 56 foizi erkaklar, 44 foizi esa ayollar hissasiga toʻgʻri kelgan.
Qarz oluvchilarning asosiy qismini 31–50 yoshdagi fuqarolar tashkil etdi. Ushbu yosh toifasidagi 22 814 nafar fuqaro jami kredit oluvchilarning 65 foizini tashkil qilgan. Shuningdek:
- 18–30 yoshdagilar — 8 564 nafar yoki 25 foiz;
- 51 yoshdan yuqorilar — 3 385 nafar yoki 10 foiz.
Foiz stavkalari 16,8–21,7 foiz oraligʻida
Ipoteka kreditlari boʻyicha oʻrtacha foiz stavkasi moliyalashtirish manbasiga qarab farqlangan.
Respublika byudjeti mablagʻlari hisobidan ajratilgan kreditlarning oʻrtacha stavkasi 16,8 foizni tashkil etgan. Oʻzbekiston ipotekani qayta moliyalashtirish kompaniyasi mablagʻlari hisobidan berilgan kreditlar 21,5 foiz, banklarning oʻz mablagʻlari hisobidan ajratilgan ipotekalar esa oʻrtacha 21,7 foizdan rasmiylashtirilgan.
Har uchinchi ipoteka Toshkent shahriga toʻgʻri kelgan
Hududlar orasida eng katta ipoteka hajmi Toshkent shahrida qayd etildi. Poytaxtda besh oy davomida 3,32 trln soʻmlik kredit ajratilgan. Bu mamlakat boʻyicha jami ipotekaning qariyb 31 foiziga teng.
Keyingi oʻrinlarni:
- Andijon viloyati — 897 mlrd soʻm;
- Qashqadaryo viloyati — 794 mlrd soʻm;
- Surxondaryo viloyati — 693 mlrd soʻm;
- Fargʻona viloyati — 682 mlrd soʻm egallagan.
Eng kam ipoteka krediti Sirdaryo viloyatida — 283 mlrd soʻm hamda Jizzax viloyatida — 329 mlrd soʻm miqdorida ajratilgan.
Xalq banki ipoteka bozorida yetakchi
Banklar kesimida Xalq banki 1,88 trln soʻmlik ipoteka krediti bilan birinchi oʻrinni egalladi. Agrobank 1,56 trln soʻm, Milliy bank 1,48 trln soʻm, Ipoteka-bank esa 1,25 trln soʻmlik kredit ajratgan.
Shuningdek, Oʻzsanoatqurilishbank tomonidan 930 mlrd soʻm, Mikrokreditbank tomonidan 574 mlrd soʻm, Asakabank tomonidan 441 mlrd soʻmlik ipoteka kreditlari berilgan.
Taqqoslash uchun, 2025 yilning dastlabki besh oyida tijorat banklari tomonidan 8 trln soʻmlik ipoteka krediti ajratilgan edi. Joriy yilda koʻrsatkichning 10,6 trln soʻmga yetishi uy-joy xaridiga talab va ipoteka orqali moliyalashtirish hajmi oʻsishda davom etayotganini koʻrsatmoqda.
