Oʻzbekiston xalqaro zaxiralari ilk bor $48 mlrdga yaqinlashdi
Umumiy xalqaro zaxiralar yil boshidan beri $6,7 mlrdga oʻsdi.
Birgina mart oyida oltin-valyuta zaxiralari $2,9 mlrdga oshib, tarixiy rekord – $47,9 mlrdga yetdi.
Oʻsish asosan oltin narxi koʻtarilishi hisobiga yuzaga kelgan boʻlib, oʻtgan oyda zaxiralardagi oltinning qiymati 2 mlrddan koʻproqqa oshdi.
Markaziy bank 7 aprel kuni eʼlon qilgan maʼlumotlarga koʻra, joriy yil 1 aprel holatiga koʻra, mamlakatning oltin-valyuta zaxiralari $47,9 milliardni tashkil etdi. Bu koʻrsatkich tarixiy maksimum hisoblanadi.
Mart oyida zaxiralar $2,9 mlrdga oshib, fevralda qayd etilgan avvalgi rekordni yangiladi.
| Koʻrsatkichlar | 1 yanvar 2025 | 1 mart 2025 | 1 aprel 2025 |
| Rasmiy zaxira aktivlari (mlrd $) | 41,2 | 44,94 | 47,9 |
| Oltin (mlrd $) | 32,03 | 34,86 | 36,88 |
| Sof hajmi (mln troya unsiya) | 12,3 | 12,2 | 11,8 |
| Xorijiy valyutadagi zaxira aktivlari (mlrd $) | 8,6 | 9,53 | 10,41 |
Izoh: koʻrsatkichlar yaxlitlangan.
Umuman olganda, birinchi chorak davomida zaxiralar 6,7 milliard dollarga oʻsdi. Bu oʻsish asosan oltin narxining keskin koʻtarilishi hisobiga yuzaga keldi.
Oltin zaxiralari qiymati esa rekord narxlar tufayl $2 milliarddan ortiq oʻsib, $36,88 milliardga yetdi. Bu ham yangi rekorddir. Shunga qaramay, oltinning fizik hajmi biroz kamaydi — 12,2 million troya unsiyadan 11,8 million troya unsiyaga tushdi. Bu esa eksport omillarini aks ettirishi mumkin.
Shuningdek, valyuta zaxiralari ham oʻsdi. Mart oyida ular $0,8 milliardga koʻpayib, umumiy hajmi $10,41 milliardga yetdi. Bu esa valyuta qismi boʻyicha ham sezilarli oʻsishni anglatadi. Chorak yakunida esa valyuta zaxiralari $1,8 milliardga koʻpaydi.
Avvalroq Oʻzbekiston fevral oyida dunyo boʻyicha oltin sotish boʻyicha yetakchi boʻlganligi xabar qilingan edi. Markaziy bank mazkur oyda 12 tonna oltin sotgan.
