Oʻzbekiston ketma-ket ikkinchi oy ham oltin sotib oldi
Noyabr oyida Oʻzbekiston Markaziy banki oltin xaridini davom ettirib, 10 tonna qimmatbaho metall sotib oldi. Bu ketma-ket ikkinchi oylik xarid boʻlib, avvalgi oylarda kuzatilgan zaxiralardagi pasayishni qoplashga xizmat qilgan.
Oʻzbekiston ketma-ket ikkinchi oy ham oltin xaridini davom ettirdi. Bu haqda Jahon oltin kengashi (World Gold Council) hisobotida maʼlumot berilgan.
2025 yil noyabr oyida markaziy banklarning oltin xaridlariga boʻlgan talabi yuqori darajada saqlanib qoldi. Hisobotga koʻra, oy davomida sof oltin xaridlari 45 tonnani tashkil etgan boʻlsa, yil boshidan buyon jami xaridlar hajmi 297 tonnaga yetdi. Oltin xaridlarida asosan rivojlanayotgan bozorlar markaziy banklari yetakchi boʻlib qolmoqda.
Noyabr oyida eng faol xaridorlardan biri Polsha Milliy banki boʻldi. Bank 12 tonna oltin xarid qilib, mamlakatning umumiy oltin zaxiralarini 543 tonnaga yetkazdi. Bu koʻrsatkich Polshaning jami xalqaro rezervlarining qariyb 28 foizini tashkil etadi.
Braziliya Markaziy banki ham ketma-ket uchinchi oy oltin xaridini davom ettirib, noyabr oyida 11 tonna oltin sotib oldi.
Shuningdek, noyabr oyida Oʻzbekiston Markaziy banki 10 tonna oltin xarid qildi. Oktabr oyida ham 9 tonna oltin sotib olingan edi. Avvalroq, sentabr oyida Oʻzbekiston oltin zaxiralari yil boshida beri 21 tonnaga qisqargani maʼlum qilingan.
Ketma-ket ikki oylik xaridlar ortidan mazkur manfiy tafovut 2 tonnagacha qisqarganini taxmin qilish mumkin. Dekabr oyi uchun rasmiy maʼlumotlar hozircha eʼlon qilinmagan boʻlsa-da, Markaziy bank bu oyda ham oltin xarid qilgan boʻlishi ehtimoli mavjud.
Qozogʻiston Milliy banki noyabr oyida 8 tonna oltin xarid qildi.
Yil boshidan buyon Polsha 95 tonna oltin xaridi bilan dunyodagi eng yirik rasmiy sektor xaridori boʻlib qolmoqda. Qozogʻiston esa 49 tonna bilan ikkinchi oʻrinni egallagan.
Dunyo miqyosida esa eng yirik oltin sotuvchi sifatida taxminan 16 tonna bilan Singapur qayd etilgan.
Avvalroq Oʻzbekistonning oltin-valyuta zaxiralari hajmi tarixda ilk bor 60 mlrd dollardan oshib, 61,2 mlrd dollarga yetgani xabar qilingan edi.
Zaxiralarning asosiy qismini tashkil etuvchi oltin qiymati ham rekord darajaga chiqdi. Qimmatbaho metall narxi bir oyda 3 mlrd dollardan koʻproqqa oshib, 50,86 mlrd dollarga yetdi.
