Oʻzbekiston JSTga aʼzolik boʻyicha protokollarning 90 foizdan ortigʻini topshirdi
Oʻzbekiston Jahon savdo tashkilotiga aʼzo boʻlish boʻyicha ikki tomonlama muzokaralarning yakuniy bosqichiga yaqinlashdi. Mamlakat imzolagan 34 ta bozorga kirish protokolining 31 tasi JST Kotibiyatiga rasman topshirilgan. Ayni paytda tashkilotga koʻra, davlat korxonalari, qishloq xoʻjaligini qoʻllab-quvvatlash va import siyosatiga oid ayrim masalalar hali ochiq qolmoqda.
Oʻzbekistonning JSTga aʼzo boʻlishi boʻyicha ishchi guruhining 13-yigʻilishi 27–28 iyul kunlari Jenevada boʻlib oʻtdi. Unda Toshkentdan 30 nafar yuqori lavozimli mansabdor qatnashgan.
Oʻzbekiston delegatsiyasiga prezidentning JST boʻyicha maxsus vakili va bosh muzokarachi Azizbek Oʻrunov boshchilik qildi. Unga koʻra, tashkilot aʼzolari tomonidan yuborilayotgan yozma savollar soni kamaymoqda. Bu Oʻzbekiston boʻyicha eʼtirozlarning bosqichma-bosqich bartaraf etilayotganini va muzokaralar yakuniy bosqichga yaqinlashganini koʻrsatadi.
Ikki tomonlama protokollarning qariyb 91 foizi topshirilgan
Oʻzbekiston shu vaqtgacha bozorga kirish shartlari boʻyicha 34 ta ikki tomonlama protokol imzolagan. Ularning 31 tasi yoki qariyb 91 foizi JST Kotibiyatiga rasman topshirilgan.
Soʻnggi protokol Hindiston bilan imzolangan. Mart oyidagi avvalgi yigʻilish vaqtida Kotibiyatga topshirilgan bitimlar soni 30 ta edi. Shu tariqa, yigʻilishlar oraligʻida bu koʻrsatkich bittaga oshgan.
JST ishchi guruhi rahbari Sung-yo Choi muzokaralarning ikki tomonlama bozorga kirish qismi yakunlanishga juda yaqin ekanini qayd etdi. Ayni paytda, Oʻzbekiston bilan muzokaralarni hali tugatmagan davlatlar jarayonni imkon qadar tezroq yakunlashga chaqirilgan.
190 dan ortiq hujjat JST talablariga moslashtirilgan
Mart oyidagi yigʻilishdan buyon Oʻzbekistonda JST qoidalariga moslashtirilgan normativ-huquqiy hujjatlarning umumiy soni 190 tadan oshgan.
Asosiy oʻzgarishlar sanitariya va fitosanitariya talablari hamda oziq-ovqat xavfsizligi sohasida amalga oshirilgan. Jumladan, yagona Oziq-ovqat xavfsizligi qoʻmitasi tashkil etilgan, mahsulot yetishtirishdan isteʼmolchiga yetib borguniga qadar xavflarni baholashga asoslangan nazorat tizimi joriy qilinmoqda.
Bundan tashqari, “Oziq-ovqat xavfsizligi toʻgʻrisida”gi qonun loyihasining yangi tahriri Senatga kiritilgan. Antidemping, kompensatsiya va himoya choralariga oid qonun loyihalari ham JST bitimlariga muvofiqlashtirish maqsadida qayta koʻrib chiqilgan.
Davlat kompaniyalari va qishloq xoʻjaligi boʻyicha savollar saqlanib qolmoqda
JST aʼzolari Oʻzbekistonda ayrim qonun hujjatlarining qabul qilinishi kutilganidan sekinroq kechayotganini taʼkidladi.
Yigʻilishda valyuta operatsiyalari va toʻlovlar, importni tartibga solish, savdoni yengillashtirish, investitsiya va raqobat siyosati hamda savdodagi texnik toʻsiqlar boʻyicha savollar berilgan.
Shuningdek, davlat korxonalarini isloh qilish va qishloq xoʻjaligiga davlat yordamini tartibga solish boʻyicha qoʻshimcha oʻzgarishlar talab qilinmoqda. Oʻzbekiston tomoni qishloq xoʻjaligini ichki qoʻllab-quvvatlash masalalari boʻyicha muzokaralar ham yakuniy bosqichga kirganini maʼlum qilgan.
Ishchi guruhning navbatdagi yigʻilishini zarur hujjatlar tayyor boʻlgach, 2026 yilning kech kuzida oʻtkazish rejalashtirilmoqda.
