OpenAI Oʻzbekistonda arzonroq ChatGPT Go obuna turini ishga tushirdi
Yangi tarif narxi 5 dollar boʻlib, foydalanuvchilarga kengaytirilgan GPT-5 modeli, tasvir yaratish, fayl tahlili va uzoq xotira kabi funksiyalarga arzon narxda kengroq kirish imkonini beradi.
OpenAI Oʻzbekiston va yana bir qator davlatlarda ChatGPT’ning yangi, arzonlashtirilgan obuna turi — ChatGPT GO ni ishga tushirdi. Yangi tarif narxi 5 dollar boʻlib, u bepul versiyaga nisbatan kengaytirilgan imkoniyatlarni taklif etadi.
Ushbu reja dastlab 2025 yil avgust oyida Hindistonda sinov tariqasida taqdim etilgan edi.
Endilikda esa 89 ta davlat, jumladan Oʻzbekiston, Qozogʻiston, Turkmaniston va Qirgʻiziston foydalanuvchilari ham undan foydalanishi mumkin. Bu tashabbus OpenAI’ning narxga sezgir bozorlarda foydalanuvchilar sonini oshirish strategiyasi doirasida amalga oshirilmoqda.
ChatGPT Go bepul va Plus rejalar oʻrtasida oraliq variant boʻlib, foydalanuvchilarga GPT-5 modelidan foydalanish, tasvir yaratish, fayllarni yuklash va tahlil qilish, hamda Python vositalaridan kengroq foydalanish imkonini beradi. Bundan tashqari, bu versiyada uzoqroq xotira va kengaytirilgan kontekst orqali suhbatlarning yaxlitligi va izchilligi yaxshiroq saqlanadi.
Foydalanuvchilar, shuningdek, loyihalar va vazifalarni boshqarish, maxsus GPT’lar yaratish hamda ularni ish jarayoniga integratsiya qilish imkoniyatiga ega boʻladi.
