Oltin narxi yana koʻtarilmoqda
Jumladan, jahon bozorida oltin narxi bir troya unsiya uchun $3 400 dan oshdi. Buning natijasida esa Oʻzbekistonda Markaziy bank tomonidan muomalaga chiqarilgan oltin quymalari narxi ham koʻtarildi.
Jahon bozorida oltin narxi yana oshmoqda. 2025 yil 7-may kuni bir unsiya oltin narxi $3 422 ga yetdi. Xabar nashr qilinayotgan paytda qimmatbaho metall $3 385 dan savdo qilinmoqda
Mutaxassislar bu vaziyatni AQSh prezidenti Donald Tramp tomonidan olib borilayotgan tajovuzkor savdo siyosati bilan bogʻlamoqda.
Geosiyosiy va iqtisodiy noaniqlik kuchaygan bir paytda, koʻplab yirik investorlar fond birjalari kabi xavfli boʻlgan aktivlar oʻrnige, anʼanaviy tarzda "xavfsiz bandargoh" hisoblangan oltinga sarmoya yoʻnaltirishni boshladi. Bu esa oltin narxining keskin koʻtarilishiga olib keldi.
Oʻzbekistondagi narxlar
Global bozor tendensiyasi Oʻzbekiston ichki bozorida ham aks etmoqda. Oʻzbekiston Respublikasi Markaziy bankining rasmiy maʼlumotlariga koʻra, 2025 yil 7-may holatiga 1 gramm oltin narxi 1 447 010 soʻmni tashkil etmoqda. Banklar orqali sotilayotgan oʻlchovli quyma oltin quyidagi narxlarda taklif etilmoqda:
- 5 gramm — 7 235 000 soʻm
- 10 gramm — 14 470 000 soʻm
- 20 gramm — 28 940 000 soʻm
- 50 gramm — 72 350 000 soʻm
- 100 gramm — 144 701 000 soʻm
Oltin quymalarini banklardan sotib olish imkoniyati mavjud. Banklarning manzillari va batafsil maʼlumotlarni Markaziy bank rasmiy saytidan topish mumkin.
Avvalroq, Goldman Sachs oʻz prognozini yangilab, oltin narxi yil yakuniga qadar $3 700 ga yetishini maʼlum qilgan edi. Bankning taʼkidlashicha, AQSh iqtisodiyotida retsessiya (inqiroz) ehtimoli 45 foizni tashkil qiladi. Agar bu ssenariy amalga oshsa, oltin narxi bundan ham yuqoriga koʻtarilishi mumkin.
