Muzrob Mamaraimov Open Bank boshqaruv raisi oʻrinbosari etib tayinlandi
Open Bank AJ 19 martdagi qaroriga koʻra, Muzrob Mamaraimov bank boshqaruvi raisi oʻrinbosari – boshqaruv aʼzosi lavozimiga tayinlandi. Bunga qadar u bankning chakana bank xizmatlari boʻlimi boshligʻi sifatida faoliyat yuritgan
Open Bank AJ Kuzatuv kengashining 19 mart kuni boʻlib oʻtgan yigʻilishi qaroriga muvofiq bank rahbariyatida oʻzgarish yuz berdi.
Unga koʻra, Muzrob Zuxriddinovich Mamaraimov “Open Bank” AJ Boshqaruvi raisi oʻrinbosari – Boshqaruv aʼzosi lavozimiga 3 yil muddatga saylandi.
Qayd etilishicha, u lavozimiga Oʻzbekiston Respublikasi Markaziy banki bilan rasman kelishilgandan soʻng kirishadi.
Muzrob Mamaraimov bunga qadar bankning chakana bank xizmatlari boʻlimi boshligʻi sifatida faoliyat yuritgan. Avvalroq esa u 2019–2020 yillarda Agrobank tizimida turli lavozimlarda, jumladan rais yordamchisi hamda chakana bank ishi boʻyicha mutaxassis sifatida ishlagan.
Maʼlumot uchun, Smart Bank 2025 yilda oʻz nomini Open Bank deb oʻzgartirgan.
