MrBeast – 30 yoshga yetmasdan milliard dollar ishlab topgan yagona yosh milliarder

Mashhur YouTuber MrBeast (asl ismi Jimmi Donaldson) 30 yoshga yetmasdan, oʻz mehnati bilan milliard dollardan ortiq boylikka ega boʻlgan yagona yosh milliarderga aylandi.

Celebrity Net Worth saytining 2025 yil may oyidagi hisobotiga koʻra, MrBeast'ning umumiy boyligi 1 milliard AQSh dollariga yetgan. 

U hozirda dunyodagi eng yosh sakkizinchi milliarder sifatida roʻyxatga kiritilgan. Diqqatga sazovor jihati shundaki, boshqa yetti yosh milliarder boylikni avlodlaridan meros qilib olgan boʻlsa, MrBeast bu marraga oʻz mehnati evaziga erishgan. Ayni paytda u har oy 50 million dollar atrofida daromad topmoqda.

MrBeast'ning asosiy YouTube kanali 397 million obunachiga ega. Shuningdek, u MrBeast Gaming, Beast Reacts va MrBeast Philanthropy kabi qoʻshimcha kanallarni ham yuritadi. Barcha ijtimoiy platformalardagi kuzatuvchilari soni 500 milliondan oshadi. U oʻz videolarida millionlab dollar sarflanadigan hayratomuz sinovlar va saxovatli sovgʻalar bilan keng auditoriyani oʻziga jalb qilgan.

Bloger daromadining katta qismini YouTube reklamalari, homiylik shartnomalari, brend mahsulotlari savdosi hamda oziq-ovqat loyihalari – xususan, MrBeast Burger va Feastables shokolad brendidan oladi. 2023 yil yakunlariga koʻra, u burger biznesidan 223 million dollar, brend mahsulotlari savdosidan esa 53 million dollar daromad qilgan.

Reklama orqali oylik daromadi taxminan 1,4 million dollarni tashkil etsa, har bir homiylik videosi uchun 1 million dollargacha haq oladi.

Jimmi Donaldson oʻz faoliyatini 12 yoshida boshlagan. U dastlab “100 000 gacha sanash” yoki “lugʻatni oʻqib chiqish” kabi noodatiy kontentlar bilan eʼtiborga tushgan. Bugungi kunga kelib, u Forbes tomonidan eng koʻp daromad olgan kontent yaratuvchi sifatida tan olingan.

Qizigʻi shundaki, yaqinda “Diary of a CEO” podkastida bergan intervyusida u oʻzini "qogʻozda milliarder" deb atadi va bank hisobida atigi 1 million dollardan kam mablagʻ borligini taʼkidlab oʻtdi.