Mikroqarz nima va uni olishda qaysi jihatlarga eʼtibor berish kerak?
Mikroqarz – kichik miqdordagi kredit boʻlib, uni shaxsiy ehtiyojlar yoki kichik biznesni moliyalashtirish uchun olish mumkin. Mikroqarzni rasmiylashtirishda nimalarga eʼtibor berish muhim?
Mikroqarz oʻzi nima?
Mikroqarz – bu kichik miqdordagi moliyaviy mablagʻ boʻlib, shaxsiy ehtiyojlarni qondirish, kutilmagan xarajatlarni qoplash yoki tadbirkorlik faoliyatini moliyalashtirish uchun ajratiladi. Ushbu moliyaviy vosita asosan moliyaviy imkoniyatlari cheklangan kishilar va kichik biznes egalariga moʻljallangan boʻlib, uni olish shartlari odatda yengilroq boʻladi.
Mikroqarzning asosiy maqsadi – aholining moliyaviy ehtiyojlarini qondirish va iqtisodiy barqarorlikni oshirishga koʻmaklashishdir. Mikroqarz tizimi rivojlanayotgan mamlakatlarda, jumladan, Oʻzbekiston kabi davlatlarda juda ahamiyatli hisoblanadi.
Mikroqarzning asosiy maqsadlari orasidan moliyaviy xizmatlardan foydalanish imkoniyatini oshirish, yaʼni moliyaviy inklyuziyani taʼminlash ham joy oladi. Bu orqali bank xizmatlari aholining barcha qatlamlariga yetkaziladi. Undan tashqari, mikroqarzlar qisqa muddatga va kichik miqdorda berilishi tufayli mablagʻlarning aylanishi tez amalga oshadi. Bu moliyaviy tizim barqarorligini taʼminlashda muhim rol oʻynaydi.
Mikroqarzni qanday olish mumkin?
Mikroqarzlar moliyaviy tashkilotlar – bank va mikrokredit tashkilotlari tomonidan beriladi. Ushbu turdagi qarzni olish uchun birinchi navbatda aynan shunday tashkilotlar ichidan oʻzingizga mos tushadigan qulay shartlardagi mikroqarzni tanlab olishingiz kerak boʻladi. Bunda quyidagilarga eʼtibor berish maqsadga muvofiq hisoblanadi:
- Mikroqarzlar har bir bankda turli foiz stavkalarida taqdim etiladi, shu sababli stavkalarni diqqat bilan solishtirish muhim hisoblanadi.
- Mikroqarz olayotgan shaxs oʻz moliyaviy imkoniyatlarini toʻgʻri baholab, toʻlovlarni haqiqatdan ham oʻz vaqtida amalga oshira olishga ishonch hosil qilishi kerak. Bu turli xil penya va bank bilan mijoz oʻrtasida mojarolar kelib chiqishining oldini oladi.
- Kredit shartnomasini batafsil oʻrganib, yashirin toʻlovlar va jarimalarga eʼtibor berish ham toʻgʻri tanlov qilishga yordam beradi.
Mavzuga doir: Qaysi banklardan uydan chiqmasdan turib mikroqarz olish mumkin?
Banklar va mikrokredit tashkilotlar mikroqarz berishda uchinchi shaxs kafilligi, sugʻurta polisi yoki mol-mulk garovi kabi kafolatlarni ham talab qilishi mumkin. Maʼlumot uchun, hozirda Oʻzbekistonda beriladigan mikroqarzlarning maksimal miqdori 100 million soʻmni tashkil etadi.
